के लत बस्यो मलाई कहिले सुधार हुन्छ
एकदिन तिमी नबोल्दा यो दिल बिमार हुन्छ

यी पाँच दिनअघि सार्वजनिक गजल ‘के लत बस्यो’का शब्दलहर हुन्, जुन गजलको यतिबेला सामाजिक सञ्जालमा निकै चर्चा भइरहेको छ । 

गजलको खुलेर प्रशंसा गर्दै स्रोता/दर्शकहरुले आफ्नो फेसबुकमा शेयर गरेका छन् । स्रोता दर्शकहरुले लिप्सिन दिँदै टिकटक भिडियो​ बनाइरहेका छन् ।

युट्युबमा पनि मंगलबार दिउँसोसम्म २ लाख बढीभ्युज पाइसकेको छ गजलले । 

यस गजललाई डा. प्रदीप कुमार मैनालीले रचना गरेका हुन् । तिलक सिंह पेलाको संगीत र स्वर गजलमा सुन्न सकिन्छ । रिदम कंडेलले गजलको एरेन्ज गरेका हुन् ।  रेकर्डिङ स्टुडियोमा नै भिडियोको छायाँकन गरेर सार्वजनिक गरिएको हो । 

चर्चित कलाकारहरुले समेत गजलको खुलेर प्रशंसा गर्दै फेसबुकमा शेयर गरिरहेका छन् ।

चर्चित हास्य कलाकार मनोज गजुरेलले यस गजललाई शब्द, संगीत र स्वरको त्रिवेणी भनेका छन् । 

‘बजारमा हजार गजल आउँछन् तर सय/पचासमात्र चर्चित हुन्छन् । ‘नचर्चित’ जति सबै ‘नसुन्नलायक’ हुँदैनन् । केहीले मष्तिष्क छुन्छन् । केहीले मन बहलाउँछन् । अनि केहीले हृदय छुन्छन्’ उनले भनेका छन् ‘यो एउटा त्यस्तो गजल हो जसले मन, मष्तिष्क र हृदय एकपटक ‘अल्हादित’ गराउँछ ।’

चर्चित गायक शिव परियारले ‘उत्कृष्ट सांगीतिक सिर्जना’ उल्लेखसहित गजलको भिडियो आफ्नो फेसबुक वालमा शेयर गर्दै सर्जक एवं गायकलाई बधाई दिएका छन् । 

लेखक प्रदीप रोदनले यस गजल जति सुन्दा पनि धीत नमरेको उल्लेख गरेका छन् ।

‘जति सुन्दा पनि धीत मरेन, वाह साधना’ उनले फेसबुकमा गजल शेयर गर्दै लेखेका छन् । 

भिडियो निर्देशक रहेकी स्मृति तिमिल्सिना ‘गुरुआमा’ले भिडियो शेयर गर्दै लेखेकी छिन्, ‘निन्द्रा लगाउने  कि हराउने ? मन शान्त गराउने कि बेचैन गराउने ?  गीत(गजल) आएछ ।  सम्मान सर्जक,गायक अनि टिम । नोट : कतिचोटी सुनेसी धीत मर्ने हो थाहा छैन मलाई ।’

साथी रहेछ दुःख हर पल सवार हुन्छ
सुख पाहुना रहेछन् छुट्नै हतार हुन्छ
सञ्चारकर्मी राधिका अधिकारी उक्त शब्द लहरसहित आफ्नो फेसबुक वालमा गजलको भिडियो शेयर गर्दै अगाडि लेख्छिन्, ‘कति पटक सुने, सुन्दा सुन्दै कति पटक पग्लिएर बहें, कति पटक सुनेपछि धीत मर्छ थाहा छैन । यस्तै बेहिसावसँग मनमा बसिदिनेहरुले मन यसै बैचैन बनाई जान्छन् । म उनीहरूलाई नै सम्झँदै यो गीत सुनिरहेछु ।’ 

युट्युबमा आएका अधिकांश प्रतिक्रियाहरूमा गजलको खुलेर प्रशंसा गरिएको छ । कतिपयले पछिल्लो समय बजार भाइरलको पछि लाग्दा क्षमतावान गायक एवं सर्जक पछाडि परेको टिप्पणी समेत गरेका छन् ।