खानेपानी मन्त्रीका रूपमा जिम्मेवारी तोकिएका जनमत पार्टीका उपाध्यक्ष अब्दुल खानले प्रधानमन्त्री पुष्पकमल दाहाल 'प्रचण्ड'सँग भेटेरै असन्तुष्टि जाहेर गरेका छन् ।

शुरूमा उद्योग, वाणिज्य तथा आपूर्ति मन्त्रालय दिने सहमति भए पनि अन्तिम समयमा मन्त्रालय हेरफेर गरिएपछि असन्तुष्ट खानले बुधवार प्रधानमन्त्री प्रचण्डलाई भेटेर कि रोजेको मन्त्रालय दिन कि त २ वटा मन्त्रालय उपलब्ध गराउन पार्टीका तर्फबाट माग गरेका हुन् ।

आफूहरूको असन्तुष्टि सम्बोधन नभए सरकारबाट बाहिरिने चेतावनी समेत उनले दिएका छन् । एउटै मात्र मन्त्रालय दिने हो भने शहरी विकास मन्त्रालय दिनुपर्ने उनको माग छ । अन्यथा खानेपानी र वन तथा वातावरण गरी दुई मन्त्रालय दिन उनले माग गरेका छन् ।

'बालुवाटारमा प्रधानमन्त्रीज्यूसँग भर्खर वार्ता गरेर आएको छु । खानेपानी एकल मन्त्रालय मात्र लिएर नबस्ने भनेर भनेको छु,' मन्त्री खानले लोकान्तरसँग भने, 'तपाईंहरूले गरेको वाचाबाट बेइमानी गर्नुभयो । यस्तो अवस्थामा मन्त्रालयको कार्यभार सम्हाल्न सकिँदैन भनेर प्रस्टसँग भनेको छु ।'

उनले अहिलेको अवस्थामा मन्त्रालय नजाने बताएका छन् ।

'केही परिवर्तन भएपछि मात्र सरकारमा जाने हो, नभए अहिलेको जिम्मेवारी हामी बहन गर्न सक्दैनौं,' उनले थपे, 'हाम्रो प्राथमिकता त उद्योग, वाणिज्य तथा आपूर्ति मन्त्रालय र शहरी विकास मन्त्रालय हो । ती मन्त्रालय नपाउने हो भने खानेपानीसहित खालि रहेको वन मन्त्रालय दिनुपर्छ ।'

आफूहरूले राखेको प्रस्तावमा प्रधानमन्त्री प्रचण्ड सकारात्मक नै रहेको उनले दाबी गरे । 'अहिले बालुवाटारमा उच्चस्तरीय संयन्त्रको बैठक बसिरहेको छ । आशा छ, ३ बजेसम्म कुनै निर्णय आउला,' मन्त्री खानले लोकान्तरसँग भने ।