भारतका प्रधानमन्त्री नरेन्द्र मोदीको विरोध गर्दै बीबीसीले बनाएको विवादास्पद डकुमेन्ट्रीको प्रदर्शनीलाई जवाहरलाल नेहरु विश्वविद्यालय (जेएनयू) ले सोमवार रोकेको छ । 

वृत्तचित्र देखाउँदा क्याम्पसमा शान्ति तथा सद्भाव खलबलिन सक्ने विश्वविद्यालय प्रशासनको जिकिर छ । 

जेएनयूको विद्यार्थी युनियनले वृत्तचित्र प्रदर्शन गर्न खोजेको थियो । 

‘इन्डिया : द मोदी क्वेसन नामक डकुमेन्ट्री मंगलवार राति ९ बजे देखाइने भन्दै विद्यार्थी युनियनले पर्चा बाँडेको हामीले सूचना पाएका छौं । यसका लागि जेएनयू प्रशासनसँग कुनै अनुमति लिइएको छैन । यस अनधिकृत गतिविधिले विश्वविद्यालय क्याम्पसको शान्ति र सद्भाव खलबल्याउन सक्छ,’ प्रशासनले सूचना जारी गर्दै भनेको छ । 

‘विद्यार्थी वा व्यक्तिहरूलाई यो प्रस्तावित कार्यक्रम तत्कालै रद्द गर्न सल्लाह दिइन्छ । बन्द नगरेमा विश्वविद्यालयको नियमबमोजिम कठोर अनुशासनात्मक कारवाही गरिनेछ,’ त्यसमा थप उल्लेख छ । 

बीबीसीको उक्त डकुमेन्ट्रीमा सन् २००२ मा गुजरातमा भएको दंगापछिको घटनाक्रम देखाइएको छ । मोदी गुजरातका मुख्यमन्त्री हुँदा कसरी दंगाको व्यवस्थापन गरे भन्ने विषयमा त्यसमा प्रश्न उठाइएको छ । 

भारत सरकारले उक्त डकुमेन्ट्री प्रोपागान्डा भएको बताउँदै त्यसका युट्युब भिडियो र ट्विटर पोस्ट ब्लक गरेको छ ।