नेकपा (एमाले) का सचिव योगेश भट्टराईले तोकिएको समयभित्रै राष्ट्रपतिको निर्वाचन हुनुपर्नेमा जोड दिएका छन्। उनले केही समस्या भए निर्वाचन आयोगले समाधान गर्नुपर्ने बताए।

मंगलबार संसद बैठकपछि सञ्चारकर्मीहरूसँग संक्षिप्त कुराकानी गर्दै उनले संविधानले राष्ट्रपतिको कार्यकाल पाँच वर्ष भनेपछि त्योभन्दा बढी जान नमिल्ने बताए।

उनले भने, 'पाँच वर्षको समयअवधिभित्र राष्ट्रपतिको निर्वाचन गर्ने । निर्वाचनको मिति निर्वाचन आयोगले तोक्ने हो नेपाल सरकारको राय सल्लाहमा । तोकेको मितिमा नेकपा(एमाले) तयार नै छ । एमालेसँग यसमा विवाद गर्नुपर्ने कुनै विषय पनि छैन ।'

आफूहरू त्यसको विवाद र बहसमा नतानिएका पनि उनले बताए। 'केही समस्या छ भने निर्वाचन आयोगले फुकाओस् र छिटोभन्दा छिटो तोकिएको समयभित्र राष्ट्रपतिको निर्वाचन होस्,’ उनले माग गरे।

उनले राष्ट्रपति पदका लागि विपक्षी दलका नेताहरूले राष्ट्रिय सहमतिको कुरा गर्नु साँघुरो चिन्तन भएको टिप्पणी गरे।

राष्ट्रिय सहमति एजेण्डा र संवैधानिक प्रक्रियामा गर्नुपर्ने उनको भनाइ थियो। उनले राष्ट्रिय सहमतिलाई हल्का रुपमा नलिन पनि आग्रह गरे।