माओवादी स्थायी कमिटीका अधिकांश सदस्यहरूले राष्ट्रिय सहमतिमा राष्ट्रपति चयन गर्नुपर्ने पक्षमा मत राखेका छन् ।

जारी स्थायी कमिटी बैठकमा अधिकांशको मत राष्ट्रिय सहमति जुटाएर राष्ट्रपति चुनाव गरौं भन्ने रहेको जानकारी उपाध्यक्ष कृष्णबहादुर महराले दिए ।

‘राष्ट्रपतिमा राष्ट्रिय सहमति कायम गर्नुपर्छ भन्ने  धेरै कमरेडहरूले आवाज उठाउनुभएको छ’, महराले भने, ‘राष्ट्रिय सहमति कहाँ हुन्छ त्यहाँ राष्ट्रिय सहमति खोज्ने हाम्रो नीति छ ।राष्टिय सहमति हाम्रो मत हो । अरू पार्टीसँग पहल गर्न बाँकी नै छ ।’ 

यस्तो राष्ट्रिय सहमति एमाले र कांग्रेससहित हुने उनले बताए । अर्को बैठक १६ माघमा बस्ने जानकारी महराले दिए ।

हिजोको बैठकको निरन्तरता

अध्यक्ष प्रचण्डको प्रतिवेदनमाथि शुक्रबार २७ सदस्यले धारणा राखेको जानकारी महराले दिए । त्यस्तै पार्टीहरूबीच एकतासम्बन्धी प्रगतिबारे कृष्णबहादुर महराले, संगठनसम्बन्धी जनार्दन शर्मा र स्कुलिङसम्बन्धी प्रतिवेदन गिरिराजमणि पोखरेलले प्रस्तुत गरेका छन् । 

महासचिवको नेतृत्वमा उपमहासचिवको टोलीले उठेका विषयबारे ठोस् कदम लिने र स्थायी कमिटी, पोलिटब्यूरो, केन्द्रीय कमिटी पूर्णताको लागि टोलीले आवश्यक कदम लिने र १६ माघमा फेरि बैठक बस्ने महराको भनाइ छ । 

पार्टी एकताको सन्दर्भमा केही पार्टीसँग छलफल शुरु भएको महराले बताए । ‘पार्टीहरूसँग एकताका लागि छलफल शुरू भएको छ । बाबुरामजीको पार्टीसँग वार्ताको क्रम शुरु भएको छ । निष्कर्षमा पुग्न बाँकी छ,’ उनले भने ।