इजरायलका प्रधानमन्त्री बेन्जामिन नेतान्याहुले जोर्डन नदीको पश्चिमी किनारमा प्यालेस्टाइनीहरूका विरुद्ध दण्डात्मक कदम चाल्ने घोषणा गरेका छन् । 

पूर्वी जेरुसेलमको एक साइनागगमा शुक्रवार एक बन्दूकधारीले गोली हानी सातजना यहुदीको ज्यान लिएपछि नेतान्याहुले यस्तो कदमको घोषणा गरेका हुन् । इजरायली नागरिकलाई बन्दूक राख्न पाउने अनुमतिलाई तीव्रता दिने र अवैध हतियार जम्मा गर्ने प्रयासलाई अघि बढाउने पनि उनले बताएका छन् । 

अनि आतंकवादको समर्थन गर्ने प्यालेस्टाइनीहरूको घरलाई सीलबन्दी गरी डोजर चलाएर भत्काइदिने पनि उनले बताएका छन् । आक्रमणकारीको परिवारका लागि सामाजिक सुरक्षा लाभ पनि रद्द गरिएको उनको भनाइ छ ।

अनि पश्चिमी किनारमा यहुदी बस्ती थप बलियो बनाउने पनि उनले बताए ।  

नेतान्याहुको यस भनाइका कारण उक्त क्षेत्रमा तनाव र शंका थप बढ्ने आशंका गरिएको छ । अनि अमेरिकाका परराष्ट्रमन्त्री एन्टोनी ब्लिन्केनले उक्त क्षेत्रको भ्रमण गर्न लागेकोमा त्यो पनि स्थगित हुन सक्ने देखिएको छ । 

अमेरिकाले साइनागगमाथि गरिएको आक्रमणको निन्दा गरेको छ तर पूर्वी जेरुसेलम र पश्चिमी किनारमा यहुदी बस्तीहरूको निर्माणको विरुद्ध रहेको बताएको छ ।