भारतका विदेशमन्त्री एस जयशंकरले महाभारत र रामायणको प्रसंग निकाल्दै संसारका सबभन्दा महान् कूटनीतिकर्मी भगवान् श्रीकृष्ण र हनुमानजी भएको बताएका छन् । 

आफ्नो पुस्तक दी इन्डिया वेको मराठी अनुवाद भारत मार्गको विमोचनको अवसरमा बोल्दै उनले यो टिप्पणी गरेका हुन् । 

उनले भने, ‘उहाँहरूलाई कूटनीतिको परिप्रेक्ष्यमा हेर्ने हो भने कुन स्थितिमा हुनुहुन्थ्यो र उहाँहरूलाई कुन मिसन दिइएको थियो त्यो विचार गर्नुपर्छ । हनुमानजीले इन्टेलिजेन्सको काम गर्नुभयो अनि मिसनभन्दा एक कदम अघि पनि बढ्नुभयो । सीताजीलाई भेटेपछि उहाँले लंका जलाउनुभयो ।’

त्यस्तै महाभारतको उदाहरण झिक्दै जयशंकरले श्रीकृष्णको समयमा बहुध्रुवीय भारत रहेको बताए । त्यतिखेर फरक फरक राज्य थिए । सबैलाई पाण्डव र कौरवको गुटमा विभाजन गरिएको थियो । अनि बलराम र विदुर जस्ता असंलग्न पात्र पनि थिए ।

जयशंकरले पाकिस्तानप्रति भारतको दृष्टिकोणलाई कृष्ण र शिशुपालसँग तुलना गरे । पाकिस्तानका विषयमा भारतले रणनीतिक धैर्य अपनाउनुपर्ने बताइने गरेकोमा कृष्ण भगवानले शिशुपाललाई ह्यान्डल गरेको जस्तो काम गर्नुपर्ने जयशंकरको भनाइ छ । शिशुपाललाई एक सयपटक क्षमा गरेपछि श्रीकृष्णले जे गर्नुभयो, पाकिस्तानलाई भारतले त्यही गर्ने जयशंकरको भनाइ छ । 

भिडियो हेर्न तलको लिंक क्लिक गर्नुहोला :

https://fb.watch/ilWuJYI8az/