नेपाल भारत खुला सीमा संवाद समूहले नेपालको कालीगण्डकीबाट लगिएको शिलाले नेपाल भारतको युगौंदेखिको सम्बन्धलाई थप बलियो बनाएको बताएको छ। 

समूहले आज जनकपुरमा एक कार्यक्रम गरी उक्त कार्यले युगौंदेखिको नेपाल-भारत समाजिक, सांस्कृतिक, धार्मिक, भाषिक, रहन–सहन र बेटीरोटीको सम्बन्ध थप मजबुत भएको बताएको हो। 

वर्तमान समयमा सनातन वैदिक हिन्दु धर्मका भगवान पुरुषोत्तम श्री रामको जन्मभूमि अयोध्यामा श्रीराम मन्दिर निर्माण कार्यको शुरुवात भएको भन्दै त्यसलाई स्वागत गरेको छ।

साथै यस शुभ–कार्यमा हिन्दु धमावलम्बीले भगवान् विष्णुको अवतारका रूपमा मानिने शिलावाट भगवान् रामको बालस्वरुपको मूर्ति बनाइने भएको तथा उक्त शिला नेपालको कालीगण्डकीबाट लगिएको हुनाले दुई देशबीच सम्बन्धलाई पुनः नवीकरण गरेको ठानेको छ। 

त्रेतायुगमा माता जानकी र भगवान रामको विवाहले नेपाल–भारतबीचको सम्बन्धलाई प्रगाढ बनाएको थियो ।

छ करोड वर्ष पुरानो शिला नेपालको कालीगण्डकीबाट ल्याइएको र जनकपुर हुँदै भारतको उत्तरप्रदेशको अयोध्या लैजाने क्रममा बाटोमा स्वःस्फूर्त श्रद्धालुहरू निस्किएका थिए। 

समूहले दुई देशबीचको पवित्र सम्बन्धलाई अझ बजमुत बनाउन नेपाल–भारत खुला सीमा संवाद समूह निरन्तर प्रयत्नशील रहँदै आएका जनाएको छ।