चितवनको माडी नगरपालिकाको आयोजनामा पाँचौँ राष्ट्रपति रनिङ शिल्ड खेलकुद प्रतियोगिता बुधबारबाट शुरु भएको छ । वसन्तपुर बजारस्थित खुल्ला चौरमा शुरू भएको सो प्रतियोगिताको माडीका नगरप्रमुख ताराकुमारी काजी महतोले सटपmुट फालेर प्रतियोगिताको औपचारिक उद्घाटन गरेकी छन् ।

सो अवसरमा नगरप्रमुख महतोले विद्यालयस्तरमा हुने खेलकुद प्रतियोगिताले विद्यार्थीको भविष्य निर्माणमा सहयोग पुग्ने विश्वास व्यक्त गरिन् । माडी नगरपालिकाको शिक्षासँगै खेलकुदको विकासलाई पनि अघि बढाउने लक्ष्यलाई राष्ट्रपति रनिङ शिल्ड प्रतियोगिताले थप टेवा दिने बताइन् ।

माघ २० गतेसम्म सञ्चालन हुने प्रतियोगितामा माडीका ८ सामुदायिक तथा २ संस्थागत विद्यालयगरी १० विद्यालयले सहभागिता जनाएका छन् । पालिकास्तरबाट छनोट भएका खेलाडीहरु जिल्ला, प्रदेश हुँदै केन्द्रस्तरीय प्रतियोगितामा सहभागिताका लागि चयन हुने आयोजकले जनाएको छ ।

कार्यक्रममा माडी नगरपालिकाका नगर उपप्रमुख खेमप्रसाद महतो, प्रमुख प्रशासकीय अधिकृत पुष्पराज ढकाल, नगर प्रवक्ता दण्डपाणि पौडेल, सामाजिक विकास अधिकृत दीपेन्द्रराज पौडेल, युवा, खेलकुद तथा सांस्कृतिक समितिका संयोजक पुरन महतोलगायतले मन्तव्य राखेका थिए । विद्यालय तहमा अध्ययनरत १८ वर्षमुनिका विद्यार्थीको सहभागिता रहेको सो प्रतियोगितामा मार्शल आर्ट्स र एथलेटिक्स समूहका खेलहरुमा प्रतिस्पर्धा शुरू भएको छ ।

प्रतियोगिताको बुधबार सम्पन्न १५०० मिटर दौडमा छात्रतर्फ माडी मावि, वसन्तपुरका अमन बोट र छात्रातर्फ सोमेश्वर मावि, बरूवाका अस्मी सुनारले स्वर्ण पदक पाएका छन् । छात्रतर्फको सो प्रतिस्पर्धामा जनकल्याण माविका मन्दिप नेपालीले रजत र माडी माविका कमल खनालले कास्य पदक प्राप्त गरेका छन् । सोहीअनुसार छात्रातर्फ माडी माविकी पुनिता सहनीले रजत र कृष्णनगर माविकी मनीषा परियारले कास्य पदक जितेका छन् ।

त्यस्तै, ८०० मिटर दौडमा छात्रतर्फ सगरमाथा मावि, हनुमानझुलाका बुद्ध लोप्चन र छात्रातर्फ सोमेश्वर माविकी आयुषा थापामगरले स्वर्ण पदक प्राप्त गरे भने छात्रतर्फ जनजीवन माविका निशान हरिजनले रजत र सोमेश्वर माविका सौरभ महतोले कास्य प्राप्त गरे । छात्रातर्फ माडी माविकी कल्पना रोकाले रजत र सगरमाथा माविकी रूसिता प्रजाले कास्य पदक प्राप्त गरेका छन् ।