काठमाडौं महानगरपालिकाका मेयर बालेन शाह र नेपाल अन्तर्राष्ट्रिय चलचित्र महोत्सव (निफ) को टोलीबीच महोत्सव तयारीका सम्बन्धमा छलफल भएको छ ।

आउँदो चैत २ देखि ६ गते (मार्च १६–२०) सम्म निफ–२०२३ आयोजना हुने घोषणा भइसकेको छ ।

निफ–२०२३ लाई सफल पार्न महानगरले सक्दो सहयोग गर्ने मेयर शाहले प्रतिबद्धता जनाएका भेटघाटमा सहभागी अध्यक्ष केपी पाठकले बताए । अध्यक्ष पाठकले निफ–२०२३ को हालसम्मको तयारी र महोत्सवको मोडलका सम्बन्धमा मेयर शाहलाई जानकारी गराएका थिए ।

अध्यक्ष पाठकका अनुसार मेयर शाहले क्षमताले भ्याएसम्म निफ–२०२३ लाई सहयोग गर्ने बताएका छन् ।

प्रमुख सल्लाहकार निर शाहले निफको महत्त्व बुझाएका थिए मेयर साहलाई । कलाकार संघकी वरिष्ठ उपाध्यक्ष रेजिना उप्रेतीले निफ–२०२३ को आयोजनामा महानगरको हातेमालो आवश्यक रहेकोमा जोड दिएकी थिइन् । भेटघाटमा निफ–२०२३ का संयोजक यादव भट्टराई, निर्देशक तथा निफ–२०२३ का पीआर प्रमुख ऋषि लामिछाने, अभिनेत्री सरिता गिरी, सञ्चारकर्मी सन्ध्या थापा, कपिल भण्डारी र कमलप्रसाद शर्मा समेतको सहभागिता थियो ।

निफ–२०२३ मा एक दर्जन बढी रचनात्मक कार्यक्रम (गोष्ठी, अन्तर्क्रिया) समेत आयोजना गरिने छ ।