अस्ट्रेलियाले आफ्नो मुद्रा डलरबाट बेलायती राजारानीको तस्वीर हटाउने भएको छ । 

मुलुकको केन्द्रीय बैंकले बिहीवार जानकारी दिएअनुसार, ५ डलरको नयाँ नोटमा राजा चार्ल्स तृतीयको तस्वीरको साटो आदिवासी तस्वीर राखिनेछ । तर राजाको तस्वीर सिक्काहरूमा चाहिँ कायम रहनेछ । 

अस्ट्रेलियाली मुद्रामध्ये ५ डलरको नोटमा मात्र बेलायती रानीको तस्वीर थियो । 

सरकारसँगको परामर्शमा यो निर्णय लिएको केन्द्रीय बैंकले जनाएको छ । विपक्षीहरूले यो कदम राजनीतिक उद्देश्यका साथ चालिएको बताएका छन् । 

बेलायती राजा अहिले पनि अस्ट्रेलियाका राज्यप्रमुख हुन् यद्यपि उक्त भूमिका प्रतीकात्मक मात्र छ । अन्य पूर्व बेलायती उपनिवेश जस्तै अस्ट्रेलियाले पनि बेलायतसँग कुन हदसम्म संवैधानिक सम्बन्ध कायम गर्ने भन्ने विषयमा बहस गरिरहेको छ ।