फिलिपिन्सका थप चार सैन्य अड्डामा अमेरिकी सैनिकहरूको पहुँच दिलाउने विषयमा अमेरिका र फिलिपिन्सले बिहीवार एउटा सम्झौताको घोषणा गरेका छन् । 

लामो समयदेखिका यी दुई साझेदारले चीनको सैन्य उदयलाई प्रतिकार गर्नका लागि यो सम्झौता गरेका हुन् । 

देशका रणनीतिक क्षेत्रहरूमा सहकार्य विस्तार गर्ने सहमति अमेरिकाका रक्षामन्त्री लोयड अस्टिनको भ्रमणपछि गरिएको थियो । 

हालैका वर्षमा अमेरिका र फिलिपिन्सको सम्बन्ध बिग्रेकोमा अहिले त्यसलाई सुधार्ने प्रयास भइरहेको छ । पूर्व राष्ट्रपति रोड्रिगो डुर्टेर्टेले अमेरिकाको साटो चीनलाई प्राथमिकता दिएका थिए । तर बहालवाला राष्ट्रपति फर्डिनान्ड मार्कोस जुनियरले त्यस नीतिलाई उल्ट्याउन खोजेका छन् । 

ताइवानमा चीनले बढी आक्रामकता देखाइरहेको अनि दक्षिण चीन सागरमा आफ्ना सैन्य अखडाको विस्तार गरिरहेको भन्दै मनिला र वाशिङटनले साझेदारी बलियो बनाउन खोजेका छन् । 

ताइवान तथा वरपरका जलक्षेत्रबाट फिलिपिन्स नजिकै रहेकाले चीनसँग अमेरिकाको सम्भावित भिडन्तमा फिलिपिन्स उपयोगी ठहर्नेछ । अमेरिकी वायुसेनाका चारतारे जनरलले सन् २०२५ सम्ममा अमेरिका र चीनबीच युद्ध हुने भविष्यवाणी गरेका छन् ।