प्रधानमन्त्री पुष्पकमल दाहाल ‘प्रचण्ड’का राजनीतिक सल्लाहकार एवं नेकपा (माओवादी केन्द्र)का स्थायी कमिटी सदस्य हरिबोल गजुरेलले राष्ट्रिय स्वतन्त्र पार्टीलाई सरकारमा राखिरहन प्रयास भइरहेको बताएका छन् । उनले प्रधानमन्त्रीको अप्ठ्यारो बुझिदिन आग्रह समेत गरे ।

रास्वपाले सरकार छाड्ने तयारी गरिरहेका बेला राजनीतिक सल्लाहकार गजुरेलले प्रधानमन्त्रीलाई सहज निर्णयको वातावरण बनाइदिन सो पार्टीसँग आग्रह गरेका हुन् ।

‘प्रधानमन्त्रीलाई अप्ठ्यारो परेको छ, पब्लिकको कुरा पनि सुन्नुपर्‍यो, अदालतको कुरालाई पनि ध्यान दिनुपर्‍यो,’ गजुरेलले लोकातरसँग भने, ‘सर्वोच्चको पूर्णपाठ आएको छैन, अहिल्यै प्रधानमन्त्रीलाई निर्णयमा पुगिहाल भन्नु हतारो हुन्छ ।’

तत्काल सरकारबाट बाहिरिने कुराले राम्रो म्यासेज नजाने राजनीतिक सल्लाहकार गजुरेलको भनाइ छ ।

‘सरकार अस्ति भर्खर बनेको हो, तत्काल सरकार छाड्ने कुराले राम्रो म्यासेज जाँदैन, तुरुन्तै गृहमन्त्री बनाउने कुराले पनि राम्रो म्यासेज जाँदैन,’ गजुरेलले लोकान्तरसँग भने । 

रास्वपा सभापति रवि लामिछानेले बिहीवार बिहान प्रधामनन्त्री प्रचण्डलाई भेटेर तत्काल गृहमन्त्री नियुक्त नगरे सरकार छाड्ने चेतावनी दिएका थिए ।

प्रचण्डले भने सर्वोच्च अदालतको फैसलाको पूर्णपाठ कुर्न आग्रह गरेका थिए । 

एमाले अध्यक्ष केपी शर्मा ओलीले बिहीवार नै विराटनगर पुगेर रविको पार्टीलाई गृहमन्त्री दिन सर्वोच्चको पूर्णपाठ कुर्नुनपर्ने बताएका थिए ।

सरकारबाट बाहिरिने या बसिराख्ने भन्ने निर्णय लिन रास्वपाको केन्द्रीय समिति र संसदीय दलको संयुक्त बैठक (आज) बिहीवार अपराह्न बस्दैछ ।