नेकपा एमालेका अध्यक्ष केपी शर्मा ओलीले शेर बहादुर देउवा नेतृत्वको सरकारलाई नालायक सरकारको संज्ञा दिएका छन् ।

डेढ वर्ष एउटा नालायक सरकार बन्दा अर्थतन्त्र ध्वस्त नै भएको ओलीले आरोप लगाएका छन्। 

विराटनगरमा आजदेखि शुरु भएको सीएनआई कोशी एक्स्पोको उद्घाटन गर्दै ओलीले प्रतिकूल समय आयो भन्दै उद्योगीले आत्महत्या गर्न नहुने बताएका छन् ।

'तेजवान् सूर्यलाई ग्रहण लाग्छ भने कहिलेकाहीँ व्यापारीलाई लाग्न सक्छ,' उनले नआत्तिनसमेत आग्रह गरे । ‘परमादेशबाट आएको सरकारका कारण अर्थतन्त्रमा ग्रहण लागेको थियो,’ओलीले भने, ‘अब अहिलेको सरकारले ग्रहणलाई हटाउने काम गरिरहेको छ त्यसैले नआत्तिन आग्रह गर्छु।’ 

उनले पुस ११ गतेभन्दा अगाडिको अवस्थाबाट देश चल्ने हो भने निकै संकट आउन सक्ने बताए।

अहिलेको सरकारले एक डेढ महिनाको अध्ययन गरेर बिग्रेको अर्थतन्त्रलाई लयमा फर्काउने कोशिस गरेको उनको भनाइ थियो। अहिलेको सरकारले उद्योगीहरूको समस्या तथा बिग्रेको अर्थतन्त्रलाई हाताहाती फर्काउनुपर्ने बताएका छन् ।

नेकपा एकीकृत समाजवादीका अध्यक्ष माधव कुमार नेपालप्रति लक्षित गर्दै ओलीले भने, ‘एक जना नेताले नगदा नगदी हाताहाती चाहिन्छ, उधारोले हुँदैन भनेजस्तै उद्योगीहरूको समस्या सरकारले उधारोमा नभई नगदानगदी गर्नुपर्छ ।’

उनले सरकारले जारी गरेको न्यूनतम साझा तथा प्राथमिकता कार्यक्रममा पनि उद्योग धन्दालाई प्राथमिकता राखेको दाबी गरे। अध्यक्ष ओलीले नेपालमा बनाउने कुरामा भन्दा उद्घाटन गर्ने कुरामा ध्यान दिने गरेको प्रवृत्ति बढेको समेत बताए।