मानव बेचविखन तथा ओसारपसार गर्ने कार्यमा संलग्न रहेको अभियोगमा दुई जनालाई मंगलबार प्रहरीले पक्राउ गरेको छ ।

पक्राउ पर्नेहरूमा उदयपुर उदयपुरगढी गाउँपालिका-२ घर भई टोखा नगरपलिका-३ बस्ने ४४ वर्षीय रवि थापा मगर भन्ने लाल बहादुर मगर र इलाम फाकफोकथुम गाउँपालिका-५ घर भई काठमाडौं महानगरपालिका-९ बस्ने ४१ वर्षीय डम्बर मगर भन्ने डम्बर बहादुर दर्लामी रहेका छन् ।

रविलाई काठमाडौं महानगरपालिका-३ र डम्बरलाई काठमाडौं महानगरपालिका-९ शम्भुमार्गस्थित न्यू लक्ष्मीमार्ग गेष्ट हाउसबाट प्रहरीले पक्राउ गरेको जनाएको छ।

कुवेतमा रहेको रोयल रेष्टुरेन्टमा वेटर्सको काममा मासिक पारिश्रमिक १ सय २० कुवेती दिनार तलब हुने गरी लगाइदिने र सो रेष्टुरेन्टमा राम्रो काम गरे पोर्चुगल र अमेरिका पठाइदिन्छु भनी उनीहरूले पीडितहरूसँग रकम असुलेका प्रहरीले बताएको छ।

मंसिर २६ गते भिजिट भिसामा दुबई हुँदै कुवेत लगी त्यहाँ रहेका अन्य एजेन्टहरूमार्फत १ हजार ३ सय कुवेती दिनारमा बिक्री गरी पीडितलाई दैनिक १८ घण्टासम्म काममा लगाई श्रमशोषण गरेको भन्ने उजुरीका आधारमा उनीहरूलाई प्रहरीले पक्राउ गरेको हो।

उनीहरूलाई मानव बेचविखन अनुसन्धान ब्युरो बबरमहलले कुवेतमा रहेको नेपाली राजदूतावाससँगको समन्वयमा उद्धार गरी नेपाल ल्याएको हो ।

कुवेतमा बस्ने प्रतिवादीले पीडितको मोबाइल नियन्त्रणमा लिई फेसबुकलगायत सामाजिक सञ्जालहरू प्रयोग गरी विभिन्न व्यक्तिसँग अश्लील कुराकानी गर्ने र सो कुराकानी रेकर्ड पीडितको श्रीमान्लगायत आफन्तलाई पठाइदिने धम्की दिएका प्रहरीले बताएको छ।

आफू कुवेतमा राजीखुसी आएको, बेचबिखनमा परेको छैन भन्ने भिडियो बनाई नेपाल गएपश्चात् कोहीकसैलाई उजुरी गर्दिनँ भन्ने व्यहोराको कागजसमेत ती दुईले गराएका अनुसन्धानबाट खुलेको
छ।

घटनामा संलग्न अन्य फरार व्यक्तिहरूको खोजी गर्ने साथै यस सम्बन्धमा प्रहरीले थप अनुसन्धान गरिरहेको छ ।