मिस नेपाल–२०२३ को आवेदन खुला गरिएको छ । द हिडन ट्रेजरले बिहीवार राजधानीमा एक कार्यक्रमको आयोजना मिस नेपालको नयाँ संस्करणबारे जानकारी दिएको हो । 

सहभागी हुन इच्छुकले चैत १ गतेसम्म आवेदन दिन सक्ने आयोजक हिडन ट्रेजरले जानकारी दिएको छ । 

आगामी जेठ १३ गते ललितपुरको गोदावरीस्थित सनराइज कन्भेन्सन सेन्टरमा मिस नेपालको ग्राण्ड फिनाले हुनेछ । 

मिस नेपाल प्रतियोगितामा न्यूनतम ५ फिट ३ इन्च उचाइ तथा १८ देखि २७ वर्षका अविवाहित नेपाली नागरिकता सहित नेपाली पासपोर्ट भएका युवतीले आवेदन दिन सक्नेछन् । प्रतियोगीतामा भाग लिनका लागि आवेदन शुल्क लाग्ने छैन । 

गत वर्षको मिस नेपाल अर्थ २०२२ सरिशा श्रेष्ठले फिलिपिन्समा भएको मिस अर्थ २०२२ प्रतियोगितामा सहभागी भएकी थिइन् । जहाँ उनले बेस्ट इको भिडियो (एसिया) जितेकी थिइन् । 

मिस नेपाल इन्टरनेशनल २०२२ न्यान्सी खड्का जापानको टोकियोमा आयोजित मिस इन्टरनेशनल २०२२ मा सहभागी भएकी थिइन् ।

त्यस्तै मिस नेपाल वल्र्ड प्रियंका रानी जोशी मिस वल्र्ड २०२३ मा सहभागी हुने तयारीमा छिन् । मिस वल्र्ड २०२३ मे महिनामा आयोजना हुनेछ । मिस नेपाल वल्र्ड जोशीले यतिबेला राष्ट्रिय र अन्तर्राष्ट्रिय प्रशिक्षकहरूबाट विभिन्न प्रशिक्षण लिइरहेकी छन् । 

यस वर्षको मिस नेपालमा पनि मिस नेपाल वल्र्ड, मिस नेपाल अर्थ र मिस नेपाल इन्टरनेशनल गरी तीन मुख्य विजेताहरु हुनेछन् । 

प्रतियोगीतालाई फराकिलो बनाउँदै यस पटक सातवटै प्रदेशमा अडिसन आयोजना गरिने द हिडन ट्रेजरका अध्यक्ष दिवाकर राजकर्णिकरले जानकारी दिए ।