राष्ट्रिय स्वतन्त्र पार्टीले गृह मन्त्रालय नपाए सरकारबाट बाहिरिने चेतावनी दिएको छ ।

आज (बिहीबार) साँझ अबेसम्म करिब साढे चार घण्टा लामो समयसम्म बसेको केन्द्रीय समिति र संसदीय दलको संयुक्त बैठकपछि प्रवक्ता डा मुकुल ढकालले दुई दिनभित्र आफ्नो दलले गृह मन्त्रालय नपाए सरकारबाट बाहिरिनेसम्मको निर्णयमा पुग्ने जानकारी दिएका हुन् । 

‘सत्ता गठबन्धनबीच गृह मन्त्रालय हाम्रो पार्टीलाई दिने भनेको हो । हाम्रोमा हस्तक्षेप नहोस् भनका हौं । गृहको अडानबाट पछाडि हट्दैनौं । अन्य पार्टीले को पठाउने भन्ने होइन,’ ढकालले भने, ‘प्रधानमन्त्रीले गृहमन्त्रीको नाम पठाउनुस् भनेर पठाएपछि पार्टीले निर्णय गर्छ । शुक्रबार र शनिबारको समय छ । दुई दिन थप छलफल गरेर बसौं । दुई दिनभित्र राजनीतिक सहमततिका आधारमा इमानदारीता देखाएन भने पार्टीले जे निर्णय पनि लिन सक्छ ।’

बिहीबार नै सरकारबाट बाहिरिने तयारीमा रहे पनि प्रधानमन्त्री प्रचण्ड र एमाले अध्यक्ष केपी ओलीको फोन आएपछि आफूहरू रोकिएको उनले बताए । 

‘पार्टी बैठक बस्नु अगावै प्रचडको फोन, आयो । एमाले अध्यक्ष केपी ओलीको पनि फोन आयो । यो सबै गरेपछि बैठकलाई सन्देश पठाउनुभयो । दुवैले एउटै सन्देश पठाउनुभएको छ’, उनले भने, ‘समग्र परिस्थितिलाई ध्यान दिँदै दुवै जना नेताले दुई दिनको समय माग्नुभएको कारणले गर्दा हामी रोकियौं । उच्चस्तरीय संयन्त्रको बैठक पनि बस्ने र दुई दिनपछि आवश्यक निर्णय लिने र छलफललाई जारी राख्ने निर्णय गरेका छौं ।'