अभिनेता जितु नेपालले ‘ह्यारी कि प्यारी’ चलचित्रलाई आफ्नो जीवनकै कोशेढुंगा भनेका छन् ।

चलचित्र प्रदर्शनको पूर्वसध्न्यामा बिहीवार बेलुका फेसबुकमा एक भिडियो सन्देश जारी गर्दै उनले भने – ‘भोलिका दिनमा म आफैले चलचित्र बनाएँ वा अरु कोही निर्देशकले मलाई लिँदा पनि यस किसिमको रोल पाउँदिन् । यो मेरो जीवनकै कोशेढुंगा हो ।’

अभिनेता जितुले चलचित्र प्रदर्शनमा आउँदै गर्दा मुटु ढुकढुक गरेको बताए । पहिले–पहिले मुख्य भूमिका पाइएन् (हिरो भइएन्) भन्ने चिन्ता भएको स्मरण गर्दै उनले अगाडि भनेका छन्, ‘अहिले हिरो भइयो । फेरि चल्ला कि नचल्ला भन्ने चिन्ता भयो ।’

प्रिमियरमा सबैबाट पाएको सकारात्मक प्रतिक्रियाले भने उत्साहित बनाएको उनले भनेका छन् । पहिले ‘मुन्द्रे’ बनेर दर्शकहरुको घरघरमा आएकोमा अहिले ‘ह्यारी’ बनेर फरक खालको भूमिकामा हलहलमा आएको उनले बताएका छन् । 

‘प्रिमियरमा कतिले जितुले रुवायो भन्नुभयो । वास्तवमा चलचित्र हेरेर निस्किएपछि सबैजनाको आँखा रसाउँछ’ उनले भनेका छन्, ‘जितुले रुवाउँछ भन्दा बडो अचम्म लाग्छ । फेरि जितुको हिरोइन साम्राज्ञी भन्दा त्यो पनि अचम्म लाग्छ । कसरी यिनिहरुको लभ पर्ला ? त्यो पनि अचम्म लाग्छ । त्यसकारण केही फरक र अलिकति अचम्म अवश्य लाग्छ ।’

उनले एउटा राम्रो चलचित्र बनेको बताउँदै हेरिदिन दर्शकहरुमा आग्रह गरेका छन् ।

उनले आफूसहित अभिनेत्री साम्राज्ञी राज्यलक्ष्मी शाह र अर्का अभिनेता विजय बरालसहित हलहलमा पुग्ने र दर्शकहरुसँग भेट्ने समेत बताएका छन् ।

डा. भोला रिजालको निर्माण रहेको चलचित्रलाई उनका जेठा छोरा डा. कपिल रिजालले लेखन एवं निर्देशन गरेका हुन् । चलचित्र शुक्रवारदेखि देशव्यापी प्रदर्शनमा आउन लागेको हो ।