बाँकेबाट बिहीबार पक्राउ परेका कैलाली २ बाट निर्वाचित प्रतिनिधि सभा सदस्य अरुणकुमार चौधरीलाई हवाईजहाजबाट धनगढी ल्याइएको छ । नेपालगन्जबाट जहाजमै काठमाडौं लगिएका उनलाई त्यहाँबाट श्रीएयरलाइन्सको जहाजमा धनगढी ल्याइएको हो । उनको साथमा नागरिक उन्मुक्ति पार्टीका अध्यक्ष एवम प्रतिनिधि सभा सदस्य रन्जिता श्रेष्ठ चौधरी पनि धनगढी आएकी छ्न् । 

दुबै जना जिल्ला प्रहरी कार्यालयमा रहेको अध्यक्ष श्रेष्ठले जानकारी गराइन् । १३ वर्ष अगाडि २०६६ मा थरुहट आन्दोलनको क्रममा ट्रयाक्टर जलाइएको घट्नामा प्रतिनिधि सभा सदस्य चौधरीसहित तीन जनालाई दोषी ठहर गरी कैलाली जिल्ला अदालतले ६ महिना जेल सजाय र जरिवाना सुनाएको थियो । सोही सजाय भुक्तानका लागि चौधरीलाई पक्राउ गरिएको प्रहरीले जनाएको छ । यद्यपि, अदालतको फैसला सरकार र आन्दोलरत थरुहट पक्षको सहमति विपरित रहेको नागरिक उन्मुुक्ति पार्टीले जनाएको छ । 

आन्दोलनको क्रममा लगाइएको सबै मुद्दा फिर्ता लिने र तत्काल आन्दोलन रोक्ने दुबै पक्षबीच २०६९ जेठ १० गते सहमति भएको थियो । अदालतले भने २०७० मा फैसला गरेर दोषी ठहर गरेको थियो । सो पार्टीले पक्राउ परेका सांसद चौधरीलाई अविलम्ब रिहाइको माग गरेको छ ।