निकै उचाइबाट जासूसी गर्न मिल्ने एक चिनियाँ बलून अमेरिकी आकाशमा केही दिनयता उडिरहेको पाइएपछि त्यसको ट्य्राकिङ गर्न थालिएको अमेरिकी रक्षा अधिकारीहरूले बताएका छन् । 

रक्षा मन्त्रालय पेन्टागनका प्रवक्ता ब्रिगेडियर जनरल प्याट्रिक राइडरले उक्त बलून उत्तर अमेरिकामा आइपुगेपछि कैयौं दिनदेखि त्यसमा निगरानी गरिरहेको जानकारी दिए । बलून यात्रुवाहक विमानहरूको उडानभन्दा निकै माथि उडिरहेको र त्यसले जमीनमा रहेका मानिसलाई कुनै सैन्य वा भौतिक जोखि नतेर्स्याएको उनको भनाइ छ । 

उक्त बलूनलाई गोली हानेर खसाउनका लागि राष्ट्रपति जो बाइडनलाई सैन्य अधिकारीहरूले सल्लाह दिएनन् किनकि त्यसबाट झरेको फोहरले जमीनमा रहेका मानिसलाई सुरक्षा जोखिम हुन सक्छ । 

‘निकै उचाइको यो जासूसी बलून चीनकै हो भन्नेमा हामी विश्वस्त छौं,’ अमेरिकाका एक वरिष्ठ रक्षा अधिकारीले सीएनएनलाई बताए । ‘विगतमा पनि यस्ता किसिमका गतिविधि हुने गरेका थिए,’ उनले थपे । 

बलून उडिरहेको दिशाले यसलाई अनेकौं संवेदनशील स्थलमा गएको देखाएपनि यसबाट सूचना संकलनको जोखिम नरहेको ती अधिकारीको भनाइ छ । सूचना संकलनको दृष्टिकोणबाट यो बलूनको अतिरिक्त मूल्य एकदमै सीमित रहेको उनको कथन छ । 

तैपनि संवेदनशील सूचनाको संकलन कुनै विदेशीले गरेकोमा त्यसका विरुद्ध अमेरिकाले कदम चाल्ने गरेको ती अधिकारी बताउँछन् । बलूनलाई निगरानीमा राखिरहने उनको भनाइ छ ।