प्रमुख निर्वाचन आयुक्त दिनेश थपलियाले उम्मेदवार नेपाली नागरिक हो/होइन र नागरिकताअनुसार उमेरले उम्मेदवार बन्न योग्य छ/छैन मात्र हेर्ने अधिकार आयोगलाई भएको बताएका छन्।

शुक्रबार सञ्चारकर्मीहरूसँग निर्वाचनबारे छलफल कार्यक्रमलाई सम्बोधन गर्दै उनले उम्मेदवार दिँदा पनि उम्मेदवारलाई म नेपाली नागरिक हुँ, मैले पेस गरेका सबै डकुमेण्ट ठिक छन् भनेर स्वघोषणा र दस्तखत गराउने गरेको बताए ।

राष्ट्रिय स्वतन्त्र पार्टीका सभापति रवि लामिछानेप्रति इंगित गर्दै उनले निर्वाचन आयोगलाई कुनै पनि अर्को व्यक्तिलाई कुनै अर्को पार्टी खारेज गरिपाउँ भनेर निवेदन दिने अधिकार नहुने र आयोगले पनि कुनै पार्टी खारेज गर्न नसक्ने बताए।

 'देश हाँक्न आउने व्यक्ति गलत नागरिकतालाई सही हो भनेर आउँदैन भन्ने आयोगको विश्वास हो । प्रश्न उठे पनि त्यसको छिनोफानोका लागि सम्बन्धित निकायलाई सोध्ने ह,' थपलियाले भने

स्थानीय, प्रदेश र प्रतिनिधि सभा गरेर करिव १ लाख ६० हजार उम्मेदवार भएका र उनीहरूका सबै कागजात ठिक छन् भनेर निर्वाचन आयोगले सदर गरेको उनले बताए।

'आयोगले ऊ नेपाली नागरिक हो वा होइन र नागरिकतामा भएको उमेरले उम्मेदवार बन्न योग्य छ कि छैन ? यत्ति हेर्ने हो । कुनै राजनीतिक दलको दर्ता खारेजी गर्ने विषय छ, यसलाई कानूनबमोजिम टुंग्याउनुपर्छ,' थपलियाले भने।

उनले थपे, 'राजनीतिक दल दर्तासम्बन्धी कानून अध्ययन गर्दा हुन्छ, यी व्यवस्थाले कुनै पनि अर्को व्यक्तिलाई कुनै अर्को पार्टी खारेज गरिपाउँ भनेर निवेदन दिने अधिकार दिँदैन, यदि त्यो हुने हो भने 'क' ले खारेज गरेर 'ख' भन्ने पार्टी खारेज गर्न निवेदन दिए हुन्थ्यो ।’