चीनका राष्ट्रपति सी चिनपिङले आफ्नो सेनालाई सन् २०२७ सम्ममा ताइवानमाथि आक्रमण गर्न आदेश दिएको अमेरिकी गुप्तचर निकाय सीआईएका निर्देशक विलियम बर्न्सले चेतावनी दिएका छन् । 

ताइवानका विषयमा सीको महत्त्वाकांक्षाका लागि कम आँक्न नहुने बर्न्सले बताए । रुसी सेनाले युक्रेनमा गरेको दयनीय प्रदर्शनबाट सी हच्किएको भए पनि ताइवानमाथि आक्रमणको खतरा कायम रहेको उनको भनाइ छ । 

सीले चार वर्षको अवधिमा सेनालाई ताइवान आक्रमण गर्न आदेश दिएको अमेरिकाले सूचना पाएको बर्न्सले बताए । 

‘उनले सन् २०२७ वा अन्य कुनै वर्षमा आक्रमण गर्ने निर्णय लिइसकेको भन्न नमिल्ने तर उनको ध्यान र महत्त्वाकांक्षा गम्भीर छ भन्ने कुरा बुझ्नुपर्छ,’ बर्न्सले वाशिङटनस्थित जर्जटाउन विश्वविद्यालयमा बताए ।

रुस र चीनले सीमारहित साझेदारीमा हस्ताक्षर गरेका छन् । रुसले युक्रेनमा आक्रमण गरेपछि पश्चिमले रुसलाई एक्ल्याएको भए पनि रुस र चीनबीचको आर्थिक सम्बन्ध थप गहिरो बनेको छ ।