नेकपा एकीकृत समाजवादीका अध्यक्ष माधवकुमार नेपालले एमाले र माओवादीसहितको गठबन्धन टुट्ने आकलन आफूले पहिलो दिनमै गरेको दाबी गरेका छन् । अहिले बनेको गठबन्धन भने तत्काल नटुट्ने उनको दाबी छ ।

प्रधानमन्त्री पुष्पकमल दाहाल ‘प्रचण्ड’ले मागेको विश्वासको मतमाथिको छलफलमा भाग लिँदै नेता नेपालले आफ्नो कमजोरी सुधार नगर्ने नेताको कार्यशैलीका कारण अहिलेको राजनीतिक परिस्थिति उत्पन्न भएको बताएका हुन् । 

‘त्यतिबेलाको गठबन्धन के कारणले टुट्यो, के कारणले नयाँ गठबन्धन बन्यो भन्ने कुरा खोज्न विश्वविद्यालयका कुनै शोधार्थीलाई जिम्मा लगाऔं,’ नेपालले भने, ‘के–के कारणले काम गरेको छ ? खोज र अनुसन्धान मात्र नभई नेताबाट आत्मसमीक्षा गरौं । आफैँबाट के कमी कमजोरी भयो स्वीकार्ने, सुधार्ने होइन, अरूलाई दोषारोपण गर्ने काम भएको छ ।’

एमाले अध्यक्ष केपी शर्मा ओलीप्रति लक्षित गर्दै नेता नेपालले किन कसैसँगको सहकार्य हुन सकेको छैन भनेर समीक्षा गर्नुपर्ने अवस्था आएको बताए ।

‘प्रत्येक नेताले आफ्ना काम, व्यवहार र अभिव्यक्तिको समीक्षा गर्नुपर्छ, किन कसैसँगको सहकार्य हुन सकेको छैन ?’, नेपालले भने, ‘अहिलेको परिवेश उत्पन्न हुने कुरा पहिलो दोस्रो दिनमै आकलन गरेको थिएँ । राजनीतिको नाडी छामेरै यहाँसम्म आएका छौं ।’

वैशाखमा फेरि विश्वासको मत लिने अवस्था आउने त होइन भन्ने एमाले र राप्रपा नेताहरूको कटाक्षप्रति नेपालले भने, ‘त्यो परिस्थिति आउँदैन, गठबन्धन पाँच वर्ष नै चल्छ ।’