नेकपा (माओवादी केन्द्र) लुम्बिनी प्रदेश संसदीय दलको  बैठक बिहीबार दिउँसो बस्दैछ ।

पछिल्लो समयमा फेरिएको राजनीतिक समीकरणका  विषयमा छलफल गर्न बैठक बस्न लागेको हो ।

लुम्बिनी प्रदेशमा माओवादी केन्द्र सरकारमा सहभागी छ । सत्ता गठबन्धनमा फेरबदल भएपछि लुम्बिनी प्रदेश सरकारलाई दिएको समर्थन फिर्तालगायतका विषयमा छलफल गर्न संसदीय दलको बैठक आह्वान भएको माओवादी केन्द्रका लुम्बिनी प्रदेश अध्यक्ष सुदर्शन बरालले जानकारी दिए ।

'सरकारलाई दिएको समर्थन फिर्तासहित नयाँ सरकार गठनका विषयमा छलफल गर्न बैठक बस्दैछ’, उनले भने ।

सत्ता गठबन्धनमा फेरबदल भएपछि लुम्बिनीमा नयाँ सरकार बन्दा माओवादी केन्द्रको नेतृत्वमा हुनुपर्ने दाबी छ । कांग्रेसबाट पनि सरकारमा दाबी रहेको छ । माओवादी केन्द्रले समर्थन फिर्ता लियो भने एमालेबाट मुख्यमन्त्री बनेका लीला गिरी नेतृत्वको सरकार अल्पमतमा पर्नेछ ।

मुख्यमन्त्री माओवादीसहित ५८ सांसदको समर्थनमा मुख्यमन्त्री नियुक्त भएका थिए ।

८७ सदस्यीय प्रदेशसभामा एमाले पहिलो शक्ति छ । माओवादीले संसदीय दलका नेता जोखबहादुर महराको नेतृत्वमा प्रदेश सरकार बनाउने गृहकार्य केन्द्रमा प्रधानमन्त्रीसमक्ष राख्दै आएको छ । यता कांग्रेसले पनि आफ्नो नेतृत्वमा सरकार हुनुपर्ने दाबी गर्दै आएको छ ।