संसारका दुई महाशक्ति मुलुक अमेरिका र चीनबीचको तनाव थप बढेको छ । 

अमेरिकी युद्धपोतले अनुमति नलिइकन दक्षिण चीन सागरमा चिनियाँ क्षेत्रभित्र प्रवेश गरेको आरोप चीनको सेनाले लगाएको छ । उक्त युद्धपोतमा अनेक किसिमका क्षेप्यास्त्रहरू थिए । अमेरिकाले घुसपैठको कोशिश गरेको चीनको भनाइ छ । 

प्यारासेल टापु समूह नजिक अवैध रूपमा पसेको अमेरिकी डिस्ट्रोयर युद्धपोत देखेपछि त्यसलाई फर्किनका लागि भनेको चिनियाँ सेनाले बयान जारी गरेर जानकारी दिएको छ । व्यस्त जलमार्गको शान्ति र स्थिरता कमजोर बनाउँदै चीनको जलक्षेत्रमा युद्धपोतको घुसपैठ भएको चीनको आरोप छ । 

चिनियाँ सेनाको सदर्न थिएटर कमान्डका प्रवक्ता थ्यान जुन्लीले बताए, ‘थिएटर फोर्स प्रत्येक क्षण उच्च सतर्क स्थितिमा रहन्छ र दक्षिण चीन सागरमा राष्ट्रिय सम्प्रभुता तथा सुरक्षा र स्थिरताको जगेर्नाका लागि सबै आवश्यक उपाय अपनाउँछ ।’

चीनले सम्पूर्ण दक्षिण चीन सागर आफ्नो भएको बताउँदै अन्य मुलुकहरूको दाबीलाई खारेज गर्ने गरेको छ । अमेरिकाले जलआवागमन स्वतन्त्रताका नाममा आफ्ना युद्धपोत तथा अनय जहाजहरू बारम्बार दक्षिण चीन सागर पठाउने गरेको छ । यसले गर्दा महाशक्तिहरूबीच तनाव चर्किरहेको छ ।