गुणस्तरीय पश्मिना उत्पादनका लागि च्यांग्रा भुवाको गुणस्तर निर्धारण गर्ने उद्देश्यले मुस्ताङका च्यांग्रा किसानलाई भुवाको नमूना संकलन तालिम शुरू भएको छ ।

१ हप्ता लामो तालिमपछि स्थानीय किसानका १६० च्यांग्रा गोठमा गई तालिमप्राप्त किसानहरूले अन्तर्राष्ट्रिय विज्ञको निगरानीमा ८०० वटा च्यांग्राको भुवा नमूना संकलन गरिने छ । 
        
नेपालमा पहिलोचोटी गर्न लागिएको च्यांग्राका भुवाको गुणस्तर अध्ययनले नेपाली गुणस्तरीय पश्मिनालाई अन्तर्राष्ट्रियस्तरमा स्थापित गर्न सहज हुने विश्वास लिइएको छ । मुस्ताङमा उत्पादन हुने च्यांग्राको ऊनबाट बन्ने पश्मिनाको गुणस्तर र यसले पाउने बजार मूल्यको वैज्ञानिक अध्ययन र विश्लेषण गर्न यो तालिम तथा भुवाको नमूना संकलन गर्न लागिएको हो । चैत १३ गतेसम्म च्यांग्रा भुवा संकलन तालिम र चैत १४ देखि २२ गतेसम्म भुवाको नमूना संकलन गरिनेछ ।
    
युरोपियन युनियनको सहयोगमा सञ्चालित ईयू नेपाल व्यापार तथा लगानी कार्यक्रमअन्तर्गत अन्तर्राष्ट्रिय व्यापार केन्द्रले नेपाल पश्मिना उद्योग संघ, च्यांग्रा पश्मिना किसान संघ तथा नेपाल कृषि अनुसन्धान परिषद्को सहकार्यमा मुस्ताङको घारापजोङ, दामोदरकुण्ड, बाराजोङ–मुक्तिनाथ, लोमाङथान र लो–घेकर गाउँपालिकामा यो तालिम तथा भुवा संकलन कार्यक्रम सञ्चालन गरिँदैछ ।

उच्च गुणस्तरको ठानिएको नेपाली च्यांग्रा पश्मिनाको माग स्वदेशी तथा विश्व बजारमा बढ्दै गएको भए पनि यसको वास्तविक गुणस्तरको वैज्ञानिक परीक्षण हुन सकेको थिएन । च्यांग्रापालक कृषकबाट संकलन हुने भुवाको गुणस्तरबारे पश्मिनाका ग्राहकहरू जानकार हुनु आवश्यक छ ।

कृषकका १६० गोठमा रहेका च्यांग्राका बथानबाट प्रतिगोठ ५–५ वटा गरी ८०० वयस्क च्यांग्रा छनोट गरिनेछ । संकलित नमूनालाई परीक्षणका लागि सुविधासम्पन्न र अन्तर्राष्ट्रिय मान्यताप्राप्त पशु फाइबर परीक्षण प्रयोगशालामा अध्ययनका लागि पठाइने छ ।