विराट गोल्ड कप फूटबल प्रतियोगितामा पूर्व विजेता टीम नेपाल पुलिस क्लब बाहिरिएको छ ।

पहिलो खेलमा आयोजक विराटनगर सिटीले विजयी शुरूआत गर्दै सेमिफाइनलमा पुगेको छ ।

बिहीवार भएको उद्घाटन खेलमा पूर्व विजेता टीम नेपाल पुलिस क्लबलाई १–० गोलले निराश बनाउँदै घरेलु टोली विराटनगरले अन्तिम ४ मा स्थान पक्का पारेको हो ।

जीतमा विराटनगरका आशिष श्रेष्ठ नायक भए । निर्धारित समयसम्म गोलरहित खेल बराबरी भएपछि थप गरिएको अतिरिक्त समयको ११७औं मिनेटमा विराटनगरका आशिष श्रेष्ठले निर्णायक गोल गरे । दिवाकर चौधरीले निकालिदिएको पासलाई आशिषले गोलमा परिणत गरे ।

खेलको १०३ मिनेटमा सागर थापाको ठाउँमा मैदान प्रवेश गरेका आशिषले टीमको जीतका लागि निर्णायक गोल गरेका छन् । 

पहिलो हाफसम्म पुलिसले विराटनगरलाई दबाबमा राखेको थियो । निर्धारित समयसम्म प्रहरीका लागि निकै संघर्षपूर्ण बन्यो । प्रहरीले केही उत्कृष्ट अवसर सिर्जना गरे पनि गोलमा परिणत हुन नसक्दा निर्धारित समयसम्म दुवै टीमको गोलरहित खेल बराबरी भयो ।
 
पुलिसले २०७४ सालमा विराट गोल्ड कपको उपाधि हात पारेको थियो । पूर्व विजेता प्रहरीले दर्जन बढी सुन्दर अवसर खेर फाल्दा प्रतियोगिताबाट बाहिर बाध्य भयो ।

खेलको पाँचौं मिनेटमा पुलिसका बुद्ध लामाको प्रहार विराटनगरका गोलरक्षक प्रदीप भण्डारीले उत्कृष्ट बचाए । १८औं पुलिसका रवि शंकर पासवानको प्रहार बारमा लागेर फर्किएको थियो । २४औं मिनेटमा विराटनगरका अभिषेक गुरुङको प्रहार पुलिसका गोलरक्षक सञ्जीव श्रेष्ठले बचाए । 

२८ मिनटेमा पुलिसका ओसेन्द्र कटुवालको ३० यार्डदेखिको प्रहार बाहिरियो । ४१औं मिनेटमा पुलिसका रवि शंंकर पासवानले पेनाल्टी एरियादेखि गरेको प्रहार पोसमाथिदेखि बाहिरिँदा गोल हुनबाट चुक्यो ।

दोस्रो हाफपछि विराटनगरले केही सुन्दर मुभहरू बनाउन सफल रह्यो । ५५औं मिनेटमा अभिषेक गुरुङको प्रहार बाहिरियो । ८३औं मिनेटमा पुलिसमा भरत साहले पेनाल्टी एरियाबाट गरेको प्रहार गोल गर्न चुके । ८४औं मिनेटमा विराटनगरका युता सुजीकीले ३० यार्डदेखिको प्रहार पोसमाथिबाट बाहिरियो । ८८औं मिनेटमा पुलिसका रविशंकर पासवानको सशक्त प्रहार बाहिरियो । ९०औं मिनेटमा विराटनगरका सन्देश विकले डिबक्सभित्र बल नियन्त्रणमा लिन नसक्दा गोल गर्नबाट चुके । 

सय मिनेटमा विराटनगरका अभिशेष गुरुङले ३० यार्डदेखिको प्रहार फितलो भएको थियो । १०५ मिनेटमा पुलिसका भरत साहको वान भर्सेस वानको अवसर सदुपयोग गर्न सकेनन् । लगत्तै पुलिसका रविशंकरले  डिफेन्डरलाई बिट मार्दै निकालिदिएको क्रस पासलाई भरत साहले अघि बढाएको बल सदुपयोग गर्न सकेनन् । ११३औं मिनेटमा विराटनगरका अभिशेष गुरुङले निकालेको पास पेनाल्टी एरियाबाट दिवाकर चौधरीले गरेको हेडिङ पुलिसका गोलरक्षक सन्जित श्रेष्ठले विफल पारिदिए । 

प्रतियोगिताको ‘म्यान अफ द म्याच’ विराटनगरका उत्सव राई घोषित भए । उनले नगद २५ हजार रुपैयाँ पाए । 

शुक्रवार नेपाल आर्मी र जावलाखेल युथ क्लबबीच खेल हुनेछ । चैत १६ गतेसम्म सञ्चालन हुने प्रतियोगितामा स्वदेशी र विदेशीसहित ८ टीमको सहभागिता छ ।

प्रतियोगिताको विजेता टीमले २० लाख १५ हजार र उपविजेताले १० लाख १५ हजार रुपैयाँ पुरस्कार पाउने छन् ।