सरकार विस्तारका लागि भागबण्डा मिलाउन प्रधानमन्त्री पुष्पकमल दाहाल ‘प्रचण्ड’ र कांग्रेस सभापति शेरबहादुर देउवाबीच भेटवार्ता भएको छ ।

सोमवार बिहान कांग्रेस सभापति शेरबहादुर देउवा प्रचण्डलाई भेट्न प्रधानमन्त्री निवास बालुवाटारमा पुगेका हुन् । 

भेटमा सरकार विस्तारका क्रममा सत्ता गठबन्धनका दलले कति मन्त्रालय पाउने र कुन–कुन पाउने भन्नेमा छलफल भएको जानकारी बालुवाटार स्रोतले दियो । 

‘सरकार विस्तारको अन्तिम तयारीस्वरूप छलफल भएको हो । छलफलमा सरकार विस्तारमा दलले पाउने मन्त्रालयको विषयमा पनि छलफल भएको बुझिएको छ,’ बालुवाटार स्रोतले भन्यो, ‘अब छिट्टै सरकार विस्तारको अन्तिम टुंगो लगाउन गठबधन्धनको बैठक बोलाउने समझदारी भएको छ ।’

प्रधानमन्त्रीका प्रेस विज्ञ मनहरि तिमल्सिनाले मंगलवार दिउँसो ४ बजे सत्ता गठबन्धनको बैठक बोलाइएको जानकारी दिए । 

भेटमा नेकपा एसका अध्यक्ष माधवकुमार नेपाल पनि सहभागी थिए ।

सत्तारुढ दलबीच कांग्रेसले ७ मन्त्री र १ राज्यमन्त्री, माओवादीले ५, जसपा र नेकपा एसले २/२, जनमत, लोसपा, नागरिक उन्मुक्ति र स्वतन्त्रले १/१ मन्त्रालय लिने गरी प्रधानमन्त्री प्रचण्डले प्रस्ताव तयार गरेका छन् । यी प्रस्तावलाई प्रधानमन्त्रीले गठबन्धनको बैठकमा प्रस्तुत गर्ने तयारी गरेका छन् ।

संख्याका विषयमा दलहरू समझदारीनिकट पुगे पनि मन्त्रालयमा दलबीचको भागबण्डा मिलिसकेको छैन । प्रभावशाली मन्त्रालयमा सबै दलले दाबी गरेपछि भागबण्डा मिलाउन सकस परेको बालुवाटार स्रोतको भनाइ छ ।

कांग्रेसले अर्थ, परराष्ट्र सहितका मन्त्रालयमा दाबी गरेको छ । गृह माओवादीले आफैं राख्ने तयारी गरेको छ तर ऊर्जा, स्वास्थ्य र शिक्षामा जसपा, नेकपा एस, लोसपा सहितका दलको दाबेदारी रहेको बताइन्छ । 

सरकार विस्तार, उपचुनाव सहितका विषयमा छलफल गर्न कांग्रेसले पनि मंगलवार बस्ने गरी केन्द्रीय कार्यसम्पादन समितिको बैठक मंगलवार बिहान ९ बजे बोलाएको छ ।