बागबजारस्थित पद्मकन्या क्याम्पसस्थित नेविसंघकी इकाई सभापति सगुन कँडेलमाथि आक्रमण भएको छ । 

गएराति क्याम्पस परिसरसबाट निस्कँदै गरेकी कँडेलमाथि नेविसंघकै अर्को पक्षले आक्रमण गरेको जानकारी नेता लक्ष्मी खतिवडाले दिइन् । 

‘पद्मकन्यामै छलफलपछि निस्कँदा सामान्य वादविवादमा घम्साघम्सी हुँदा सगुन बहिनीलाई टाउकोमा हल्का चोट लागेको हो । उनी मेरो बाइकको पछाडि थिइन् । पछाडिबाट उनीमाथि आक्रमण हुँदा बाइक लड्यो उनलाई चोट लाग्यो । म पनि लडें,’ खतिवडाले भनिन्, ‘आन्तरिक विवादमा वादविवाद हुँदा नेविसंघकै साथीहरूले आक्रमण गरेका हुन् ।’

समानुपातिक सूची पठाउने विषयमा नेविसंघभित्र लफडा भएको एक विद्यार्थी नेता बताउँछन् । 

‘यो अरु संगठनसँग भएको झडप होइन आन्तरिक नै हो । समानुपातिक सूची पठाउने विषयमा लफडा भएको बुझेका छौं,’ ती नेताले भने, ‘स्ववियु सदस्यमा जितेकैमध्येबाट सगुनलाई उपसभापतिमा पठाउने चर्चा र तयारी थियो । यसैले विवाद बढाएका हुन सक्छन् ।’

आइतबार राति ९ बजेतिर यस्तो घटना भएपछि कँडेललाई उपचारका लागि एभरेस्ट अस्पताल लगिएको थियो । 

सिटीस्क्यान गर्दा उनको टाउकोमा लागेको चोट सामान्य देखिएको बताइएको छ ।