भारतको आम आदमी पार्टीले ‘मोदी हटाओ, देश बचाओ’ नारा सहितको पोस्टर ११ वटा भाषामा सार्वजनिक गरेको छ । 

यी पोस्टरहरू देशभरि बिहीवार टाँसिनेछ । 

पाँच दिनअघि पार्टीले दिल्लीको जन्तर मन्तरमा विशाल आमसभा आयोजना गरेको थियो । त्यसमा दिल्लीका मुख्यमन्त्री अरविन्द केजरीवाल र पञ्जाबका मुख्यमन्त्री भगवन्त मान सहभागी थिए । 

त्यही सभामा पार्टीका दिल्ली संयोजक गोपाल रायले ‘मोदी हटाओ, देश बचाओ’ नारा सहितको पोस्टर देशभरि टाँसिने जानकारी दिएका थिए । 

दिल्लीका पर्खाल र बिजुलीका पोलमा यी पोस्टरहरू टाँसिएका छन् । त्यसपछि दिल्ली प्रहरीले ६ जनालाई पक्राउ गरेको छ र १०० वटा जाहेरी दर्ता गरेको छ । 

त्यसपछि आम आदमी पार्टीले एउटा ट्वीट गरेको छ । त्यसमा लेखिएअनुसार, ‘मोदी सरकारको तानाशाही चरममा पुगेको छ । यो पोस्टरमा के त्यस्तो आपत्तिजनक कुरा थियो र मोदीजीले १०० वटा जाहेरी दिनुपरेको हो ? प्रधानमन्त्री मोदी, भारत लोकतान्त्रिक मुलुक हो भन्ने कुरा शायद तपाईंलाई थाहा छैन । एउटा पोस्टरबाट किन यति धेरै डराएको ?’