मदन भण्डारी स्पोर्टस् एकेडेमीले विभिन्न खेल विधाका राष्ट्रिय प्रतियोगिता गर्ने भएको छ ।

एकेडेमीले देशका विभिन्न स्थानमा क्रिकेट, कराँते, रेसलिङ, ब्याडमिन्टन, चेस, फुल कन्ट्याक्ट लगायतका राष्ट्रिय प्रतियोगिता आयोजना गर्न लागेको हो ।

फूटबल, भलिबल, तेक्वान्दो, फुटसल, डोरी तान लगायतमा प्रदेशस्तरीय प्रतियोगिता गर्दैछ ।

एक कार्यक्रमबीच राष्ट्रियसँगै प्रदेशस्तरीय वार्षिक खेल तालिका सार्वजनिक गरेको हो । एकेडेमीका अध्यक्ष धुर्व आचार्यका अनुसार आउँदो जेठ २३–३० गतेसम्म पोखरामा केपी ओली रनिङ सिल्ड राष्ट्रिय क्रिकेट प्रतियोगिता आयोजना गर्ने हुनेछ । प्रतियोगितामा च्याम्पियनले १० लाख, उपविजेताले ५ लाख  एवं बेस्ट बलर र ब्याट्स म्यानले २५–२५ हजार रुपैयाँ नगद पुरस्कार पाउने जानकारी दिए ।

वैशाख ५ देखि ६ गतेसम्म काडमाडौंको लैनचौरमा राष्ट्रिय जुनियर लेवल टेबल टेनिस प्रतियोगिता आयोजना हुनेछ । १५ र  १९ वर्षमुनिको छात्रछात्रा टेबल टेनिस प्रतियोगितामा प्रथमले १५, द्वितीयले १० र तृतीयले १० हजार रुपैयाँ नगद पुरस्कार पाउनेछन् ।

जसअन्तर्गत वैशाख २५ र २६ गते भक्तपुरमा खुला राष्ट्रिय ब्याडमिन्टन प्रतियोगिता आयोजना हुनेछ । प्रतियोगितामा प्रथम हुनेले १ लाख, द्वितीयले ५० हजार  र तृतीयले २५ हजार रुपैयाँ नगद पुरस्कार पाउनेछन् । भेन्ट्रासतर्फ प्रथमलाई ५० हजार, द्वितीयलाई ३० हजार र तृतीयलाई २० हजार रुपैया नगद पुरस्कार दिइनेछ ।

जेठ ३१ गते सुर्खेतमा राष्ट्रिय रेसलिङ प्रतियोगिता आयोजना हुनेछ । प्रतियोगितामा हेभीवेट च्याम्पियनलाई १ लाख ५ हजार, हार्ड कोर च्याम्पियनलाई ७५ हजार, मिडल वेट च्याम्पियनलाई ६० हजार, ट्याग टीम च्याम्पियनलाई ५० हजार र लाइट वेट च्याम्पियनलाई ४० हजार रुपैयाँ नगद प्रदान गरिनेछ ।

बुटवलमा जेठ २–४ गतेसम्म राष्ट्रिय चेस प्रतियोगिता हुनेछ । प्रतियोगितामा प्रथमलाई २० हजार नगदसहित १०औं स्थानसम्मलाई पुरस्कार राखिएको छ ।

जेठ ४–१० गतेसम्म काठमाडौंको त्रिपुरेश्वरमा राष्ट्रिय खुला बास्केटबल पुरुष र महिला रनिङ शिल्ड प्रतियोगिता आयोजना हुनेछ । जसमा विजेताले १ लाख ५० हजार रुपैयॉ र उपविजेताले १ लाख रुपैयाँ नगद पुरस्कार पाउनेछन् ।

मदन भण्डारी स्पोर्टस् एकेडेमीले सातै प्रदेशमा प्रदेशस्तरीय खेल प्रतियोगिता आयोजना गर्दैछ । जसअन्तर्गत वैशाख २७ देखि जेठ १५ गतेसम्म ७ वटै प्रदेश मुकाममा मदन भण्डारी अन्तरमावि रनिङ शिल्ड फूटबल प्रतियोगिता गर्नेछ । जसमा विजेताले १ लाख र उपविजेताले ५० हजार रुपैयाँ नगद पुरस्कार पाउनेछन् ।

आउँदो असार १ देखि १५ गतेसम्म ७ वटै प्रदेशमा प्रदेश स्तरीय मदन भण्डारी अन्तरमावि प्रदेश रनिङ शिल्ड प्रतियोगिता आयोजना गरिनेछ । प्रतियोगितामा विजेताले १ लाख र उपविजेताले ५० हजार रुपैयाँ नगद पुरस्कार पाउनेछन् ।

वैशाख २८ देखि असार १० गतेसम्म ७ वटै प्रदेश मुकाममा मदन भण्डारी अन्तरमावि रनिङ शिल्ड भलिबल प्रतियोगिता गर्नेछ । प्रतियोगितामा प्रथमले ५० हजार, द्वितीयले २५ हजार र तृतीयले १० हजार रुपैयाँ नगद पुरस्कार पाउनेछन् । वैशाख २५ र २६ गते काठमाडौंमा बाग्मती प्रदेश स्तरीय तेक्वान्डो प्रतियोगिता आयोजना गर्दैछ । जसमा प्रथमले ३० हजार, द्वितीयले २० हजार र तृतीयले १० हजार रुपैयाँ नगद पुरस्कार पाउनेछन् ।

एकेडेमीले मधेश प्रदेश स्तरीय डोरीतान प्रतियोगिता सप्तरीमा गर्दैछ । असार २२ गते हुने प्रतियोगितामा प्रथमले ५० हजार रुपैयाँ नगद पुरस्कार पाउनेछ ।

बुटवलमा असार ३–५ गतेसम्म विद्यालयस्तरीय आत्मरक्षा तालिम दिनेछ । खेलकुद विकासका लागि खेलाडी, प्रशिक्षक, निर्णायक तथा व्यवस्थापकलाई जेठ ३ गते काठमाडौंमा अन्तर्क्रिया कार्यक्रम आयोजना गर्नेछ ।

एकेडेमीले अन्तराष्ट्रिय खेलकुद दिवसको अवसरमा वैशाख २३ गते बुद्धजन्मस्थल लुम्बिनीमा पिस ओपन हाफ म्याराथन प्रतियोगिता गरेर वार्षिक खेलको शुरूआत गरेको थियो । एकेडेमीका खेल प्रतियोगितामा राष्ट्रिय खेलकुद परिषद, स्थानीय तह र विभिन्न संघसस्थाहरूले समन्वय गर्ने अध्यक्ष आचार्यले बताए ।