टर्की (टुर्किये) मा आइतवार भएको राष्ट्रपति निर्वाचनमा कुनै पनि उम्मेदवारले बहुमत नल्याउने संकेत देखिएको छ । 

टीआरटीवर्ल्ड डट्कमका अनुसार, अहिलेसम्म ९८ प्रतिशत मतगणना भइसकेको छ । त्यसमा बहालवाला राष्ट्रपति रेचेप तैयिप एर्दोआनले ४९.३४ प्रतिशत मत ल्याएका छन् भने प्रतिस्पर्धी कमाल किलिचदारोग्लुले ४५ प्रतिशत मत हासिल गरेका छन् । त्यस्तै सिनान ओगानले ५.२२ प्रतिशत मत ल्याएका छन् ।

पहिलो चरणमा कुनै पनि उम्मेदवारले ५० प्रतिशत मत नल्याएमा मे २८ मा दोस्रो चरणको निर्वाचन हुनेछ । 

हिजै संसदीय निर्वाचन पनि भएको थियो । कुल ६०० सीटका लागि भएको निर्वाचनमा एर्दोआनको एके पार्टीले २६६ जितेको छ । उनको दल सम्मिलित पिपुल्स अलायन्स गठबन्धनले ३२२ सीट जितेर बहुमत ल्याएको छ । 

विपक्षी नेशन्स अलायन्सले २१२ सीट जितेको छ भने अन्य दलले ६२ सीट जितेका छन् ।