नेपाल रिपब्लिक मिडियाले प्राथमिक शेयर (आईपीओ) निष्कासन गरेको छ ।

हाल विदेशमा रहेका नेपालीका लागि न्यूनतम १० देखि अधिकतम ५०० कित्तासम्म आवेदन दिन सकिनेगरी ३१ जेठबाट कम्पनीले आईपीओ जारी गरेको छ ।

नागरिक दैनिक र रिपब्लिका प्रकाशन गर्दै आएको लिमिटेडले आईपीओ जारी गर्दा सार्वजनिक गरेको विवरण पत्रमै लगातार ६ वर्ष नोक्सानमा रहिरहने चित्र देखाइएको छ । कम्पनीको तथ्यांकअनुसार लगानी डुबाउने निश्चित छ ।

पछिल्लो तीन वर्षमा ४१ करोडबाट ४६ करोड हुँदै ५१ करोड रूपैयाँ घाटामा गएको कम्पनीको चालू आर्थिक वर्षको तेस्रो त्रैमासमै ४७ करोड रूपैयाँ घाटामा देखिएको छ । यो वर्ष विगतका वर्षभन्दा बढी घाटा हुने रिपब्लिक मिडियाको आगामी तीन वर्षसम्म पनि लगातार घाटामै रहने तथ्यांक सार्वजनिक गरेर आईपीओ सार्वजनिक गरिएको छ ।

विदेशमा रहेका नेपालीलाई १४ जेठसम्म आईपीओ भर्न समय दिएको यो संस्थाले त्यसपछि सर्वसाधारणबाट आवेदन माग गर्ने छ । 

कम्पनीको  प्रतिशेयर आम्दानी गत वर्षसम्म १० रूपैयाँ नकारात्मक थियो भने चालू आवको चैतसम्ममा ७ रूपैयाँ २२ पैसा देखाएको छ । तर, यही आर्थिक वर्षमा भने यस्को प्रतिशेयर आम्दानी जम्मा १ रूपैयाँ २२ पैसा मात्रै हुने विवरणपत्रमा उल्लेख छ । यस्तो आम्दानी ३ वर्षपछि ९ रूपैयाँ ६६ पैसा पुग्ने कम्पनीको दाबी छ । 

कम्पनीको वित्तीय अवस्थामात्रै नभएर रेटिङमा पनि कमजोर छ । कम्पनीको वित्तीय दायित्व बहन गर्न सक्ने क्षमता उच्च जोखिम रहेको यसले पाएको रेटिङमा देखिन्छ ।

वित्तीय अवस्था कमजोर भएको यो कम्पनीले सर्वसाधारणबाट ४३ करोड ५३ लाख रूपैयाँ संकलन गर्ने र त्यो रकम ऋण तिर्न प्रयोग गर्ने बताएको छ । यसले सर्वसाधारणबाट उठाएको रकमध्ये ३० करोड रूपैयाँ ऋण तिर्न प्रयोग गर्ने र बाँकी साढे १३ करोड अनुत्पादक क्षेत्रमा लगानी गर्ने स्पष्ट उल्लेख गरेको छ ।

यसले २ करोड रूपैयाँ अत्याधुनिक प्रविधियुक्त मिडिया बनाउने, २ करोड ५० लाख पत्रकारको क्षमता अभिवृद्धिमा खर्च गर्ने, ४ करोड रूपैयाँ छपाई केन्द्र बनाउनेसहितमा खर्च गर्ने भएको छ । 

हाल पत्रकारलाई तलब दिन नसेको भनेर बजारमा नकारात्मक हल्ला भइरहेको यो संस्थाले आईपीओबाट पनि लाभ गर्ने र लगानीकर्तालाई प्रतिफल दिने ग्यारेन्टी गर्न सकेको छैन । यो संस्थाले २ करोड रूपैयाँ त घरजग्गामा नै लगानी गर्ने भनेको छ ।

कम्पनीमा अध्यक्ष विनोदराज ज्ञवालीको ९८.२१ प्रतिशत उनकी श्रीमती शोभा ज्ञवालीको १.७२ प्रतिशत शेयर छ । यी सञ्चालकद्वयले गत आर्थिक वर्षमा १ करोड २३ लाख रूपैयाँ तलबभत्ता मात्रै बुझेका थिए ।

कम्पनीका अध्यक्ष विनोदराज, कार्यकारी सञ्चालकसमेत रहेकी श्रीमती शोभा र सीईओसमेत रहेकी छोरी समृद्धि ज्ञवालीले मात्रै वार्षिक डेढ करोड रूपैयाँ बुझेका छन् । लोकतन्त्र आएपछि प्रकाशनमा आएको यो मिडिया हाउसले नाफा कमाउन नसकेपछि सर्वसाधारणलाई डुवाउने गरी आईपीओ निष्कासन गर्दै छ ।

यसको आईपीओका लगानीकर्ताले वर्षौंसम्म लाभ नपाउने निश्चित छ ।