भुटानी शरणार्थी कार्यदलका संयोजक बालकृष्ण पन्थीले शरणार्थी प्रतिवेदनमा हेरफेर भएको प्रहरी समक्ष कागज गरेका छन् ।

मूल प्रतिवेदन र संशोधित प्रतिवेदनमा व्यापक हेरफेर गरिएको तथा प्रविधिको प्रयोग गरी आफ्नो दस्तखतको दुरुपयोग गरिएको उनले खुलाएका छन् ।

२०७६ कात्तिक १ गते पेश गरेको भुटानी शरणार्थी समस्याको स्थायी र दीर्घकालिन समाधान पहिल्याउने उपायहरू सम्बन्धी प्रतिवेदनको केही खण्ड र भागहरूमा परिवर्तन देखिएको उनले बयानमा भनेका छन् ।

‘प्रतिवेदनको बुँदा नम्बर २.६ (आ)को व्यहोरा पूर्णरूपमा फरक देखिएको छ’ प्रहरीलाई दिएको बयानमा उनले भनेका छन् । ‘विभिन्न कारणले छुट भएका भनी ५८१ परिवारले दिएको दरखास्तहरू वास्तविक रूपमा दर्ता हुन छुट भएका शरणार्थीहरू हुन् भन्ने आधार प्रमाण केही पनि देखिन आएन भन्दै ती दरखास्तवालाहरूको लगतमा नाम नराख्नुको कारणको बारेमा थप वाक्यहरूको खण्डमा फेरबदल भएको रहेछ,’ उनले गराएको बयान कागजमा उल्लेख छ ।

‘प्रतिवेदनको पृष्ठ १७ मा उल्लेखित ३.७ नम्बरको बुँदालाई भाषा र व्यहोरा परिवर्तन गर्दै बुँदा नम्बर ३.२ लेखिएको छ र उपबुँदा (१)को व्यहोरालाई परिवर्तन गरिएको छ,’ पन्थीले प्रहरी समक्ष गरिदिएको कागजमा उल्लेख छ ।

‘प्रतिवेदनमा हाम्रो दस्तखत आधुनिक प्रविधिको दुरुपयोग गरी राखिएको महसुस भयो, हामीले सही हरी मन्त्रालयमा बुझाएको सक्कल प्रतिवेदन जुन २०७६ मंसिर १७ मा मन्त्रिपरिषद् सचिवालयमा प्रस्तावसहित पठाइएको हुनुपर्छ । प्रतिवेदनको पृष्ठ १८ निष्कर्ष खण्डको दोस्रो अनुच्छेदमा फेरबदल भएको छ,’ पन्थीले गरेको बयान कागजमा उल्लेख छ ।

‘प्रतिवेदनमा राखेको अनुसूचीहरूको फर्म्याट र फन्ट जुन र जस्तो प्रकारको छ, देखाइएको प्रतिवेदनमा निकै फरक फर्म्याट र फन्टमा छ,’ पन्थीले गरेको कागजमा थप लेखिएको छ,’ मन्त्रालयमा बुझाएको प्रतिवेदनमा जम्मा ९ वटा अनुसूची छन्, तर देखाइएको प्रतिवेदनमा १० वटा अनुसूची रहेका छन् ।’

त्यस बाहेक प्रतिवेदनको लेखाइको स्पेस म्यानेजमेन्ट र फन्ट पनि फरक पारेको भन्दै उनले प्रहरी समक्ष बयान दिएका छन् ।