नेकपा एकीकृत समाजवादीले नक्कली भुटानी शरणार्थी प्रकरणमा थप संघर्षका कार्यक्रम गर्ने भएको छ । 

पार्टीको मोर्चा संगठन विभागको नवौं बैठकले नक्कली भुटानी शरणार्थी प्रकरणविरुद्ध थप आन्दोलनको घोषणा गरेको हो । 

जेठ १६ गते दिउँसो ४ बजे भ्रष्टाचारविरुद्ध काठमाडौंको माइतीघर मण्डलामा जुलुससहित नयाँ बानेश्वरमा पुगी सभा गर्ने निर्णय भएको विभागका प्रमुख डा. विजय पौडेलले जानकारी दिए । उनका अनुसार सोही दिन देशका ७७ वटै जिल्लामा पनि एकैसाथ विरोध प्रदर्शन, र्‍याली र कोणसभा गरिने छ । 

संघर्षका लागि मोर्चा संगठनको तर्फबाट पार्टी केन्द्रीय कमिटी, भूगोलका सबै प्रदेश कमिटी, विशेष प्रदेश कमिटी, सम्पर्क समन्वय कमिटी, जिल्ला कमिटी, विशेष जिल्ला कमिटीलाई सहयोगका लागि पार्टीले अनुरोध गर्ने जनाएको छ ।

यसअघि पनि पार्टीको मोर्चा संगठन विभागले काठमाडौंसहित देशभर नक्कली भुटानी शरणार्थी प्रकरणमा दोषीमाथि हदैसम्मको सजाय माग गर्दै प्रदर्शन गरेको थियो ।