विराटनगरबाट २० तोला सुन र ३६ किलो चाँदीका गरगहना चोर्ने ३ जना पक्राउ परेका छन् ।

विराटनगर–१२ का २१ वर्षीय राजकुमार कामत, १९ वर्षीय विवेक कामत र २२ वर्षीय श्रीकान्त दासलाई प्रहरीले नियन्त्रणमा लिएको छ ।

आरोपीहरू गरगहना चारेपछि विराटनगर–७ हाटखोलास्थित  दिव्य रत्ना होटलमा बास बसेका थिए । 

पक्राउ परेकाहरू पेशेवर चोरीमा संलग्न रहेको प्रहरीले जनाएको छ । उनीहरूले जेठ ३ गते राति ९ः४५ बजे विराटनगर–३ पिपलचोकस्थित जय किशोर चौधरीको घरबाट २० तोला सुन, ३६ किलो चाँदी चोरी गरेको प्रहरीले जनाएको छ । 

चोरी गरेको १ हप्तापछि चाँदी बिक्री गर्न भारत लैजाने क्रममा प्रहरीले उनीहरूलाई विराटनगर–१२ कोशी प्रोजेक्टबाट पक्राउ गरेको मोरङ प्रहरीका प्रमुख एसपी दीपक पोखरेलले जानकारी दिए । प्रहरीले उनीहरूको साथबाट ३६ किलो चाँदी, ८ ग्राम सुन, २ हजार ५०० भारु, १ हजार ७३० नेपाली रुपैयाँ बरामद गरेको छ ।

चोरी गरेको २० तोला सुन भारतको जोगवनीमा बिक्री गरेको पक्राउ परेका प्रतिवादीहरूले बयानको क्रममा प्रहरीलाई बताएका छन् । उनीहरूले भारतको जोगवनीमा ७ लाखमा सुन बेचेको प्रहरीको प्रारम्भिक अनुसन्धानबाट खुलेको एसपी पोखरेलले बताए । 

बरामद गरेको चाँदी, सुन र पक्राउ परेका आरोपीहरूलाई प्रहरीले बिहीवार पत्रकार सम्मेलन गरी सार्वजनिक गरेको छ । गरगहना चोरेपछि उनीहरू होटलमा ३ दिन बसेका प्रहरीले जनाएको छ । उनीहरू पटक–पटक चोरीका घटनामा संलग्न भएको समेत प्रहरीले जनाएको छ ।

पक्राउ परेकाहरू चोरी कार्यमा यसअघि पनि सजाय भुक्तान गरी जेलबाट छुटेका थिए । विवेक २०७९  साउन २२ गतेदेखि ९ महिना कैद भुक्तान गरेपछि वैशाख २८ गते छुटेका थिए । श्रीकान्त दास डाँकाचोरी मुद्दामा २०७७  पुस २९ गतेदेखि २० महिनाको सजाय भुक्तान गरेर २०७९ असोज ३ गते छुटेका थिए ।

कैद भुक्तान गरेर कारागारबाट छुटेपछि उनीहरू पुरानै धन्दामा लागेको पाइएको छ ।