नक्कली भुटानी शरणार्थी प्रकरणमा आज (शुक्रवार)बाट काठमाडौं जिल्ला अदालतमा अभियुक्तको बयान शुरू भएको छ। जिल्ला न्यायाधीश प्रेमप्रसाद न्यौपानेको इजलासमा प्रतिवादीहरूको बयान शुरू भएको हो । 

शुरूमा अभियुक्त सानु भण्डारीको बयान लिने तयारी थियो । तर, बिरामी भएको बताएपछि उनको बयान आज नहुने भएको छ । उनको ठाउँमा अर्का अभियुक्त सागर राईको बयान लिन थालिएको छ । त्यसपछि आजै केशव दुलालको बयान लिइने छ ।

जिल्ला अदालतका अनुसार आज दुई जनाको मात्रै बयान लिइने छ ।

दुई जनाको मात्रै बयान हुने भएपछि अन्य अभियुक्तलाई हिरासत फिर्ता लगिएको छ । 

यसअघि सबै अभियुक्तलाई अदालतमा उपस्थित गराइएको थियो ।

प्रकरणको बयान र थुनछेकमै कम्तीमा दुई साता लाग्ने बताइएको छ ।

प्रकरणमा जोडिएका पूर्वउपप्रधान र पूर्वगृहमन्त्रीसहित १६ जनालाई पक्राउ गरेको छ । १४ जना भने फरार छन् । 

नेपालीहरूलाई नक्कली भुटानी शरणार्थी बनाएर अमेरिका पठाउन खोज्ने ३० जनाविरूद्ध बुधवार काठमाडौं जिल्ला अदालतमा मुद्दा दर्ता गरिएको थियो।