चिनियाँहरूले सोडियमको शक्तिबाट चल्ने तीन विभिन्न किसिममा कार बनाएका छन् । 

यी कारहरू पेट्रोलबाट चल्ने वा विद्युतीय कारहरूभन्दा सस्तो पर्छन् । स्वच्छ ऊर्जालाई प्रोत्साहन गर्ने भएकाले वातावरणवादीहरू यो कार बजारमा छिट्टै आएर सर्वसाधारणहरूले अपनाउनेमा आशावादी छन् । 

चीनका तीन कार कम्पनीहरू बीवाईडी, चेरी र जेएसीले सन् २०२३ मै सोडियम–आयन कारहरूको बिक्री सर्वसाधारणका लागि खोल्ने बताएका छन् । 

बीवाईडीको सोडियम कारको नाम सीगल हो र यो जम्मा ११ हजार डलर (१४ लाख ५३ हजार) मा पाइन्छ । यो निकै सस्तो मूल्य हो किनकि युरोपमा औसत कारको मूल्य लगभग ३० हजार डलर पर्छ । 

यति सस्तो मूल्यमा कार पाउँदा यसले बजार पिट्नुपर्ने हो तर सबैजानले यो कार मन पराउने ग्यारेन्टी छैन । 

यसले दिने माइलेजका कारण उपभोक्ताहरू हिचकिचाउन सक्ने सम्भावना छ । एकपटक चार्ज गरेपछि यस्ता कारहरू २०० देखि ३०० किलोमिटर मात्र गुड्न सक्छन् । अहिले उपलब्ध विद्युतीय कारहरू एकपटक चार्ज गरेपछि ३०० देखि ५०० किलोमिटर गुड्न सक्छन् । 

त्यसैले सोडियमबाट चल्ने कार अफिस वा स्कूल वा शहरभित्रका र केही परका ठाउँमा त जान सक्छन् । तर देशका कुनाकुनामा वा अर्को देशमा यस्तो कार लिएर जान सम्भव हुँदैन ।