भारतको औपचारिक भ्रमणमा रहेका प्रधानमन्त्री पुष्पकमल दाहाल प्रचण्ड दिल्लीस्थित नेपाली दूतावास पुगेका छन् । प्रधानमन्त्रीको सम्मान तथा स्वागतमा राजदूत शंकर शर्माले आयोजना गरेको रात्रिभोजमा सरिक हुन उनी नेपाली दूतावास पुगेका हुन् ।

रात्रिभोजमा भारतीय विदेश मन्त्रालयका अधिकारी, अन्य कूटनीतिक नियोगका अधिकारी, नेपाली विभिन्न संघसंस्थाका प्रतिनिधि र सञ्चारकर्मीलगायतको सहभागिता छ ।

चार दिने भ्रमणका सिलसिलामा आज दिउँसो दिल्ली पुगेका प्रचण्डले पहिलो भेट प्रधानमन्त्री नरेन्द्र मोदीका सुरक्षा सल्लाहकार अजित डोभालसँग गरेका छन् ।

प्रचण्डलाई भेट्न डोभाल प्रधानमन्त्री बसेको होटलमा पुगेका थिए । डोभालको साथमा भारतीय विदेश सचिव विनयमोहन क्वात्रा थिए भने प्रचण्डसँग उनकी छोरी गंगा दाहाल थिइन् ।

४ दिने औपचारिक भ्रमणमा दिल्ली पुगेका प्रधानमन्त्री प्रचण्डले भोलि बिहीवार समकक्षी नरेन्द्र मोदीसँग द्विपक्षीय भेटवार्ता गर्ने कार्यक्रम छ । भोलि बिहीवार नै प्रतिनिधिमण्डल स्तरमा वार्ता र केही सम्झौता गर्ने कार्यक्रम छ ।

बुधवार अपराह्न दिल्ली पुगेका प्रचण्डलाई इन्दिरा गान्धी अन्तर्राष्ट्रिय विमानस्थलमा विदेश राज्यमन्त्री मीनाक्षी लेखीले स्वागत गरेकी थिइन् । भारतीय विदेश मन्त्री डा. एस जयशंकर देशबाहिर रहेका कारण स्वागतमा राज्यमन्त्री आएकी हुन् ।