प्रिमियममा आइपीओ निष्कासन गर्ने पहिलो बीमा कम्पनी बन्यो आईएमई लाइफ इन्स्योरेन्स

आईएमई लाइफ इन्स्योरेन्स कम्पनी लिमिटेडले प्रिमियममा आइपीओ निष्कासन गर्ने भएको छ । बीमा क्षेत्रमा पहिलोपटक कम्पनीले प्रिमियममा आइपीओ निष्कासन गर्न लागेको हो ।

नेपाल धितो पत्र बोर्डले स्वीकृति दिएसँगै प्रति कित्ता रु २३६.९१ मा कम्पनीले आफ्नो जारी पुँजीको ३० प्रतिशतले हुने १ करोड २० लाख कित्ता शेयर सर्वसाधारणको लागि जारी गर्ने भएको छ ।

नेपाल धितोपत्र बोर्डले विवरण पत्र प्रकाशनको लागि स्वीकृति दिएको हो ।

कम्पनीको शेयर निष्कासन तथा बिक्री प्रबन्धक सिभिल क्यापिटल लिमिटेड रहेको छ ।​

आइपीओ निष्कासनका लागि गरिएको रेटिङमा केयर रेटिङ नेपालले कम्पनीलाई ‘केयर ट्रिपल बी इस्युअर’ रेटिङ प्रदान गरेको हो । चालू आर्थिक वर्षको तेस्रो त्रैमाससम्म कम्पनीले रु.२ अर्ब ९८ करोड ५८ लाख कुल बीमा शुल्क आर्जन गरेको छ । यस अवधिमा कम्पनीले कम्पनीले रु.२ अर्ब ८९ करोड ४ लाख खुद बीमा शुल्क आर्जन गरेको छ । कम्पनीको चुक्ता पूँजी रु.२ अर्ब ८० करोड रुपैयाँ रहेको छ । यस अवधिसम्ममा कम्पनीको जगेडा कोषमा रु.१ अर्ब १० करोड ५ लाख रुपैयाँ संचिती रहेको छ ।

यसै गरी जीवन बीमा कोषमा रु.६ अर्ब ७ करोड ७३ लाख रुपैयाँ रहेको छ र कम्पनीको दीर्घकालीन लगानी तथा कर्जा रु. ८ अर्ब ४ करोड ७१ लाख रुपैयाँ रहेको छ । तेश्रो त्रैमाससम्ममा कम्पनीको खुद नाफा रु. १८ करोड २४ लाख रुपैयाँ रहेको छ । यस अवधिसम्म कम्पनीको वार्षिक प्रतिशेयर आम्दानी रु. ८ रुपैयाँ ६९ पैसा रहेको छ । प्रतिशेयर नेटवर्थ १४३ रुपैयाँ ६७ पैसा रहेको छ ।

नेपालको प्रतिष्ठित र अग्रणी व्यावसायिक समूह आइएमई ग्रुपद्वारा प्रवर्द्धित विभिन्न कम्पनीहरू मध्ये आईएमई लाइफ इन्स्योरेन्स कम्पनी पनि एक हो ।
दक्ष तथा अनुभवी व्यवस्थापनद्वारा संचालित यस इन्स्योरेन्सले बीमित तथा शेयरधनीहरूलाई उच्चतम प्रतिफल प्रदान गर्ने लक्ष्य लिएको छ ।
आर्थिक विकासका लागि बीमा क्षेत्रबाट अर्थपूर्ण सहभागिता जनाउनु यस कम्पनीको उद्देश्य रहेको छ ।