नेकपा एमालेकी सांसद सुनिता बरालले आगामी आर्थिक वर्षको बजेट पुनः ल्याउन अर्थमन्त्री डा. प्रकाशशरण महतलाई आग्रह गरेकी छिन् । 

प्रतिनिधिसभामा बजेटमाथिको छलफलमा भाग लिँदै बुधवार उनले बजेटले मुलुकमा विद्यमान समस्या समाधान गर्ने आशा जगाउन नसकेको भन्दै पुनः बजेट पेश गर्न माग गरेकी हुन् । ‘चालु खर्च पुनरावलकोन गर्न, बजेटको सिलिङ पुनरावलोकन र फेरि बजेट पेश गर्न अर्थमन्त्रीसमक्ष आग्रह गर्दछु’, उनले भनिन् । बजेटमा आगामी आर्थिक वर्षमा ६ प्रतिशत आर्थिक वृद्धिको लक्ष्य निर्धारण गरिनु खुसीको विषय भए पनि बैंक तथा वित्तीय संस्थाले हाल गरिरहेको कर्जाको अवस्था हेर्दा लक्ष्य हासिल गर्न चुनौती रहेको उनले बताइन् ।

६ प्रतिशतको आर्थिक वृद्धि हासिल गर्न बैंक तथा वित्तीय संस्थाले १५ देखि १८ प्रतिशतको कर्जा विस्तार गर्नुपर्नेमा चालु आर्थिक वर्षको हालसम्मको अवधिमा जम्मा ३.५ प्रतिशत मात्र कर्जा विस्तार हुनुले सरकारको लक्ष्य पूरा नहुने तर्क बरालले गरिन् । 

बजेटले शिक्षा क्षेत्रमा पर्याप्त लगानीको ढोका नखोलेको भन्दै बरालले यथेष्ट लगानीविना शैक्षिक गुणस्तर उकास्न कठिन रहेको बताइन् ।

एमाले सम्बद्ध विद्यार्थी संगठन अनेरास्ववियुको पूर्वअध्यक्षसमेत रहेकी बरालले उच्च माध्यमिक तहको शिक्षा अध्ययन गरेका युवालाई स्वदेशमै राख्ने नीति सरकारको हुनुपर्नेमा अहिलेको नीति त्यसतर्फ अग्रसर नभएको गुनासो उनले गरिन् । शैक्षिक गुणस्तर सुधारमा पर्याप्त ध्यान नदिए आगामी दशकमा सरकारी स्वामित्वका आधारभूत विद्यालय बन्द हुने अवस्था आउने उनको दाबी थियो ।

उच्च शिक्षालाई व्यावसायिक बनाउन शैक्षिक ऋणको प्रभावकारी कार्यान्वयनको वातावरण मिलाउन सरकारसँग उनले माग गरिन् ।

फरक प्रसंगमा बरालले बजेटले संघीय प्रणालीलाई अवलम्बन गर्न नसकेको आरोप लगाइन् ।