उपप्रधान तथा गृहमन्त्री नारायणकाजी श्रेष्ठले कोशी प्रदेश सभाकी उसभामुख सृजना दुनुवार र नेकपा एमालेका सांसद राम रानामाथिको आक्रमणमा संलग्नमाथि कारबाही गर्ने प्रतिवद्धता जनाएका छन् ।

शुक्रवार बसेको प्रतिनिधि सभा बैठकमा सभामुखसँग समय लिएर बोलेका मन्त्री श्रेष्ठले दोषीलाई कानूनको दायरामा ल्याउन प्रहरीले प्रक्रिया अगाडि बढाइसकेको जानकारी गराएका हुन् । 

कानून हातमा लिएर अराजक क्रियाकलाप गर्ने जो कोहीलाई सरकारले छुट नदिने उनले बताए ।

त्यसअघि एमाले सांसद योगेश भट्टराईले बिहीवार भएको घटना सम्बन्धमा सरकारको जवाफ माग गरेका थिए । 

मन्त्री श्रेष्ठले कोशी प्रदेशको नाम संवैधानिक रूपमा संशोधन गर्ने कुरालाई सरकारले समर्थन गर्ने तर उदण्ड गतिविधिलाई कानूनको दायरामा ल्याउने बताए । कोशी प्रदेश संघर्षको नाममा अवाञ्छनीय र अराजक गतिविधि देखा पर्नु दु:खको विषय भएको उनले बताए । 

एमाले प्रदेश सभाका सदस्य रामरानामाथि इलाममा ढुंगा मुडा गरिए पनि कालोमोसो दलिएको प्रचार सही नभएको मन्त्री श्रेष्ठले बताए । 

यस्तै प्रदेश सभाकी उपसभामुख सृजना दुनुवारको गाडीको झण्डा थुतेर भागेको सदनलाई जानकारी गराए । 

मन्त्री श्रेष्ठले गणतन्त्र र संघीयताको रक्षाका लागि पनि शान्तिपूर्ण आन्दोलन गर्न आन्दोलनरत पक्षलाई आग्रह गरे ।