चालु आर्थिक वर्ष २०७९/८० को १० महिना (वैशाखसम्म)मा आइपुग्दा अर्थतन्त्रका सबै सूचक सकारात्मक देखिएका छन् ।

नेपाल राष्ट्र बैंकले सार्वजनिक गरेको वैशाखसम्मको देशको वर्तमान अर्थिक तथा वित्तीय स्थितिअनुसार रेमिट्यान्स आयमा उल्लेख्य सुधारले अर्थतन्त्रका सूचकमा सुधार आइरहेको छ ।

तथ्याङ्कअनुसार १० महिनामा १० खर्ब ५ अर्ब रुपैयाँ रेमिट्यान्स भित्रिएको छ । मासिक औसतमा १ खर्ब रुपैयाँका दरले भित्रिएको यही रेमिट्यान्सको ढाडसले अर्थतन्त्रको सुधारमा सहयोग गरिरहेको छ ।

देशको अर्थतन्त्रको बाह्य सूचक वैशाखसम्म आइपुग्दा अब्बल अवस्थामा रहेको देखिएको छ । राष्ट्र बैंकले सार्वजनिक गरेको तथ्याङ्कअनुसार अर्थतन्त्रका बाह्य सूचकमा रेमिट्यासमा भएको वृद्धि र शोधनान्तर बचतसँगै उल्लेख्य सुधार आएको छ ।

केन्द्रीय बैंकले पछिल्लो समय लिएको नीतिको कारण अर्थतन्त्रमा पछिल्लो ६ महिनादेखि निरन्तर सुधार देखिएको हो । आयात घटेको, रेमिट्यान्स बढेको, विदेशी मुद्राको सञ्चितिमा सुधार आएको र देश भित्रने र बाहिरिने रकमबीचको अन्तर (शोधनान्तर स्थिति)मा सुधार आएकोले पनि अर्थतन्त्रको बाह्य सूचक अब्बल देखिएको राष्ट्र बैंकको तथ्याङ्कले देखाएको छ ।

आयात धान्ने क्षमता ६ महिनासम्म झरिसकेको अवस्थाबाट सुधार भएर ९ महिनासम्म धान्न सक्ने अवस्थामा पुगेको छ । चालु खाता एवं शोधनान्तर स्थितिमासमेत उल्लेख्य रुपमा सुधार भइरहेको छ ।

अघिल्लो वर्षको तुलनामा चालु खाता घाटामा उल्लेख्य सुधार भएको केन्द्रीय बैंकको तथ्याङ्कले देखाएको छ ।

तथ्याङ्कअनुसार वैशाखसम्ममा ७ खर्ब ५६ अर्ब राजस्व संकलन भएको छ । यो अवधिमा खर्च भने १० खर्ब ४७ अर्ब भएको कारण आन्तरिक अर्थतन्त्र भने संकुचनमा छ । यो समयसम्ममा बैंकिङ प्रणालीमा ३ खर्ब १८ अर्ब रुपैयाँ निक्षेप थुप्रिएको छ ।

नेपाल सरकारसँग नगद मौज्दात नै यो अवधिसम्ममा १ खर्ब ८० अर्ब रुपैयाँ रहेको पनि तथ्याङ्कले देखाएको छ ।