नेकपा (संयुक्त)का ८२ वर्षीय नेता चन्द्रदेव जोशी सोमवार बयानका लागि भन्दै महाराजगञ्जस्थित नेपाल प्रहरीको सीआईबी कार्यालय महाराजगञ्ज पुगेका थिए । लौरो टेकेर बयानका लागि गएका उनलाई सीआईबीले बयान नै नलिइ फर्काएको पाइएको छ । 

यसको जानकारी जोशी आफैँले सामाजिक सञ्जालमार्फत् गरेका छन् । आफू बयानका लागि जाँदा सीआईबीले दुईपटक फर्काएको उनको भनाइ छ ।

‘पहिलोपटक सीआईबी प्रमुख आफैँले बयानका लागि भनेर बोलाउनु भयो । तर, फेरि अहिले नआउनु भनि खबर आयो । आज फेरि बोलाएबमोजिम सवा १ बजे सीआईबी कार्यालय पुगेको थिए । तर बयान नलिइ फेरि बोलाउँला भनी फर्काइयो,’ उनले सामाजिक सञ्जालमा लेखेका छन् ।

पूर्वमन्त्री जोशीले भ्रष्टाचारविरुद्धको हरेक प्रयासमा आफ्नो सहयोग हुने बताउँदै आफू फरार नभएको जानकारी दिएका छन् ।

‘भ्रष्टाचारविरुद्धको हरेक प्रयासमा मेरो प्रतिवद्धता कायम छ । म फरार छुँयन,’ उनले लेखेका छन् । 

आफू फरार भएको भन्ने हल्ला आएको प्रतिवाद गर्दै जोशीले स्पष्टीकरण दिएका हुन् ।

जोशी विसं २०६८ मा डा बाबुराम भट्टराई प्रधानमन्त्री हुँदा भूमि सुधारमन्त्री थिए । यसैकारण उनको नाम बालुवाटारको ललिता निवास प्रकरणमा मुछिएको छ ।