नागरिक अगुवाहरूले नेपालमा शुरू भएको भ्रष्टाचार विरोधी कारवाहीको समर्थन गरेका छन् । मंगलबार संयुक्त विज्ञप्ति जारी गर्दै १७ जना नागरिक अगुवाहरूले नेपालको इतिहासमै सम्भवत सबैभन्दा ठूलो भ्रष्टाचार विरोधी कारवाहीले भ्रष्टाचारमुक्त नेपालको परिकल्पनालाई साकार पार्न सहयोग पुर्‍याउने विश्वास लिएका छन् । उनीहरूले यसलाई अन्तिम टुङ्गोसम्म पुर्‍याई सबै दोषीहरूले सजाय पाएको हेर्न चाहेको बताएका छन् । 

तर, विभिन्न राजनीतिक दबाबका कारण भ्रष्टाचार विरोधी अभियानले सफलतापूर्वक पूर्णता नपाउँलाकी भन्ने सन्देश रहेको उनीहरूको भनाइ छ । गठबन्धनको स्वार्थ र सत्तामोहका कारण भ्रष्टाचारविरूद्धको कारवाही फितलो हुने आशङ्का जनमानसमा रहेको विज्ञप्तिमा उल्लेख छ । 

‘सत्तामा बसेकाहरू एकरूप छैनन् भन्नेमा पनि हामी प्रष्ट छौं  । जुन शक्तिहरूले यसलाई टूङ्गोमा पुर्‍याउने प्रतिबद्धतासहित अनेक  दबाबहरूबीच काम गरिरहेका छन्, तिनीहरूप्रति जनता आशावादी छन्,’ विज्ञप्तिमा भनिएको छ, 'जुन शक्तिहरू यसलाई अलमल्याई तुहाउन खोजिरहेका छन्, तिनीहरू पनि जनताको दृष्टिबाट लुकेका छैनन् । त्यसैले भ्रष्टाचारबिरुद्धको लडाइँलाई निष्कर्षमा पुर्याउन  नेपाली जनता अर्को जनआन्दोलनको सृष्टि गर्न बाध्य हुनु नपरोस् भन्ने पनि यसै व्यक्तव्यमार्फत् सचेत गराउन चाहन्छौं ।’ 

सरकारले पछिल्लो समय भ्रष्टाचारविरुद्ध एकपछि अर्को प्रकरणको अनुसन्धान गरिरहेको छ । ललिता निवासको सरकारी जग्गा हिनामिना प्रकरणको अनुसन्धान प्रतिवेदन मंगलवार मात्रै प्रहरीले सरकारी वकिलको कार्यालयमा बुझाएको छ । प्रहरीले ६० किलो सुन प्रकरणको अनुसन्धान गरिरहेको छ । यसअघि सरकारले नक्कली भुटानी शरणार्थी प्रकरणको अनुसन्धान गरेको थियो । 

यस्तो छ संयुक्त अपिल