धरान उप–महानगरपालिकाका मेयर हर्क साम्पाङलाई उच्च अदालत विराटनगरले व्यक्तिको जग्गामा जबरजस्ती प्रवेश नगर्न अन्तरिम आदेश गरेको छ ।​

प्याराग्लाइडिङ व्यवसायी रोशन अधिकारी र रोजिना अधिकारीको जमिनमा प्रवेश गरेर उनले बिरुवा रोपेका थिए । केही दिन अगाडि मात्रै उनले जग्गामा नपस्न भनेपछि घर भत्काइदिने धम्कीसमेत उनले दिएका थिए । ​

बिहीवार उच्च अदालतका न्यायाधीश दिनेशप्रसाद यादवको एकल इजलासले उनीहरूमाथि धरपकड नगर्न आदेश दिएको हो ।

बिरुवा रोपेपछि अधिकारी दम्पती अदालतमा पुगेका थिए । साउन ६ गते  धरान ४ को  छोटी मोरङ डाँडामा अधिकारी दम्पतीको जग्गामा मेयर साम्पाङसहितको टोलीले सरकारी जग्गा भएको भन्दै जबरजस्ती बिरुवा रोपेका थिए ।

त्यहाँ मेयर र दम्पतीको भनाभनसमेत भएको थियो । त्यसपछि उनीहरू उच्च अदालत विराटनगरमा गएका थिए ।

उनीहरू धरानका प्याराग्लाइडिङ व्यवसायीसमेत हुन् । उडान स्थलमै बिरुवा रोपेर असर पारेको भन्दै अधिकारी परिवारले मुद्दा दर्ता गराएका थिए ।

साउन ११ गते उच्च अदालत, विराटनगरले अन्तिम किनारा नलागेसम्म उक्त जग्गामा बिरुवा नरोप्न अन्तरिम आदेश दिएको थियो । तर गत सोमवार मेयर साम्पाङले जमिनमा प्रवेश गर्न खोजेपछि अधिकारी दम्पतीले रोक्ने प्रयास गरेका थिए ।

उनले घर भत्काइदिने धम्कीसमेत दिएका थिए । मेयर साम्पाङले दुर्व्यवहार गरेको भन्दै प्रहरीलाई फोनमार्फत जाहेरी दिएका थिए । तर प्रहरीले लिखित उजुरी नआएसम्म केही गर्न नसकिने बताउँदै आएको छ ।