जिल्ला सरकारी वकिल कार्यालय काठमाडौंले ललितानिवासको सरकारी जग्गा हिनामिना प्रकरणमा नेपाल सरकारका बहालवाला सचिव कृष्णबहादुर राउतलाई प्रतिवादी बनाएको छ ।

सचिव राउतमाथि सरकारी जग्गा व्यक्तिको नाममा लैजान कीर्ते प्रमाण जुटाइदिने प्रपञ्चमा संलग्न रहेको भएको अभियोग लगाइएको छ ।

आइतवार जिल्ला अदालतमा दर्ता गरिएको मुद्दामा राउतलाई प्रतिवादी बनाई १० करोड ५१ लाख बिगो दाबी गरिएको छ ।

२०६६ सालमा भौतिक योजना तथा निर्माण मन्त्रालयको शाखा अधिकृत रहेको समयमा उनले ललितानिवास सम्बन्धी फाइलको टिप्पणी उठाएका थिए । 

शाखा अधिकृतको रूपमा टिप्पणी उठाएका राउतलाई प्रहरीको केन्द्रीय अनुसन्धान ब्यूरोले पक्राउ गरेर अनुसन्धान गरेको थियो । सर्वोच्च अदालतको आदेशपछि उनी रिहा भएर मन्त्रालयको काम गरिरहेका छन् । 

‘...सरकारको हक मेटाई हानी पुर्‍याउने गलत नियतले फरक व्यहोराको टिप्पणी स्वीकृत गराई मन्त्रालयको तर्फबाट मन्त्रिपरिषद्मा निर्णयार्थ प्रस्ताव लगेकोमा सार्वजनिक निकायका जिम्मेवार पदाधिकारीले सरकारी अभिलेखसँग भिडाई उक्त जग्गा सरकारी हो वा मोही कायम भएको जग्गा हो भन्ने यकिन गरी मिल्ने भए मात्र ऐन, नियम र विनियमका आधारमा टिप्पणी स्वीकृत गरी पेश गर्नुपर्नेमा प्राप्त कागजातलाई मात्र आधार लिई, विश्वास गरी अन्तिम तथ्य मानी सरकारी जग्गा व्यक्तिको नाममा लैजान अधारभूत प्रमाण (कीर्ते प्रमाण) जुटाउने प्रपञ्च र योजनामा संलग्न भएको देखिएको ...’ अभियोग पत्रमा उल्लेख छ ।

सचिव राउतमाथि ‘सरकारी जग्गा व्यक्ति विशेषको नाममा मोही कायम गरेको देखिएकाले साविकको मुलुकी ऐन कीर्ते कागज महलको १ नं. र २ नं. मा परिभाषित कसुर गरेको देखिन आयो,’ सरकारी वकिलले दायर गरेको मुद्दामा उल्लेख छ ।

सहसचिव सुशील वैद्यलाई पनि ‘सरकारी अभिलेखसँग बाझिने गरी तथा अभिलेखविपरीतका व्यहोरा उल्लेख गरी सरकारी स्वामित्वको जग्गा व्यक्तिलाई मोही कायम गरी गुठीको नाममा दर्ता गरी व्यक्तिलाई लाभ पुर्‍याउने तथा सरकारको हक मेटाइ हानी पुर्‍याउने गलत नियतले कीर्ते कार्यमा संलग्न रहेको’ अभियोग लगाइएको छ ।​

सीआईबीले कीर्तेमा मुद्दा चलाउन सिफारिस गरेपछि दाङको सीडीओ रहेका वैद्यलाई गृह मन्त्रालयमा तानिएको छ । वैद्यविरुद्ध १ करोड ८ लाख बिगो कायम गरी मुद्दा दायर गरिएको छ । 

सरकारी वकिलको कार्यालयले २ सय ९० जनालाई प्रतिवादी बनाइ आइतवार काठमाडौं जिल्ला अदालतमा मुद्दा दायर गरेको छ ।

हेर्नुहोस्, सचिव राउतमाथिको अभियोग :