अख्तियार दुरुपयोग अनुसन्धान आयोगले धरानस्थित बीपी कोइराला स्वास्थ्य विज्ञान प्रतिष्ठानका इलेक्ट्रिक इन्जिनियरिङ शाखामा कार्यरत अधिकृत तेजनारायण साहउपर भ्रष्टाचारको मुद्दा दायर गरेको छ ।

प्रतिष्ठानको हाताभित्र भाडामा पसल सञ्चालन गरिरहेका व्यवसायीहरूसँग अधिकार नै नभएका विभागका एक अधिकृतस्तरका कर्मचारीले बिजुलीको महशुल संकलन गरी हिनामिना गरेको भन्दै सोमवार विशेष अदालतमा मुद्दा दायर गरिएको हो ।

साहले विभिन्न व्यवसायीबाट विद्युत् महशुलबापतको ३३ लाख २० हजार २२६ रुपैयाँ उठाइ विद्युत् महशुलसम्बन्धी सर्भरको दुरुपयोग गरेको अख्तियारको आरोप छ । 

उनले गलत बिल भौचर जारी गरी उक्त रकम प्रतिष्ठानको खातामा जम्मा नगरी सार्वजनिक सम्पत्ति हिनामिना गरेको अभियोगपत्रमा उल्लेख छ ।