नेपाल इटाली चेम्बर अफ कमर्श (एनआईसीसीआई)ले नेपाल–इटाली व्यापार सम्बन्ध प्रगाढ बन्दै गएको जनाएको छ ।

एनआईसीसीआईका अध्यक्ष सञ्जय अग्रवालको नेतृत्वमा नेपाली प्रतिनिधिमण्डलले यही भदौ १७–२३ सम्म इटालियन चेम्बरहरू रोम र मिलानको ऐतिहासिक भ्रमण गरेको थियो । भ्रमणपश्चात् एनआईसीसीआईले यस्तो प्रतिक्रिया दिएको हो ।

भ्रमण द्विपक्षीय सम्बन्धका बारेमा छलफल गर्न, व्यापारका अवसरहरूको सम्भाव्यता अध्ययन गर्नका साथै नेपाल र इटालीबीच व्यापारिक र सांस्कृतिक सम्बन्ध निर्माण तथा विस्तारमा केन्द्रित रहेको एनआईसीसीआईले जनाएको छ ।

नेपालले रोम चेम्बर अफ कमर्श एन्ड इन्डस्ट्री र मिलान चेम्बर अफ कमर्श एन्ड इन्डस्ट्रीसँग पहिलो पटक भेट गरेको हो । दुवै इटालीयन संस्था व्यवसायिक सहयोगका लागि प्रख्यात रहेका छन् ।

यो बैठकले इटालियन सरकारी अधिकारीहरू र एसोकामेरेस्टेरोको सार्वभौम परिप्रेक्ष्यमा एनआईसीसीआईको स्थापना, मान्यता, भविष्य र युरोपेली संघको लागि साझा दृष्टिकोणलाई प्रतिबिम्बित गर्दै ठूलो महत्व राखेको छ ।

यी भेटहरूमा रोमस्थित नेपालका लागि सम्मानित महावाणिज्यदूत पाओलो नुगारीसँग छलफल भएको थियो ।

सन् १९७० देखि नेपालको व्यापक अनुभवसँगै नुगारीले नेपालको भविष्यको लागि आफू आशावादी रहेको बताएका थिए । इटाली सरकारले एनआईसीसीलाई मान्यता दिलाउन सहयोग गर्ने उनको प्रतिज्ञा थियो ।

यी भेटवार्तासँगै नेपाल र इटालीबीचको सम्बन्धको आधिकारिक शुरूवातको रूपमा इटालियन बिजनेस ल्यान्डस्केपको ढोका खुला भएको एनआईसीसीआईले जनाएकाे छ । साथै एनआईसीसीआईले दुई राष्ट्रबीचको व्यापारिक सहकार्य र अवसरहरूको नयाँ युगको शुरूवात गर्न तयार रहेकाे जनाएकाे छ।

नेपाल इटाली चेम्बर अफ कमर्स एन्ड इन्डस्ट्री (एनआईसीसी) नेपाल र इटालीबीचको व्यापार र वाणिज्य प्रवर्द्धनमा समर्पित संस्था हो ।

पारस्परिक रूपमा लाभदायक साझेदारीलाई प्रवर्द्धन गर्न र दुई राष्ट्रबीचको व्यापार वृद्धिलाई सहजीकरण गर्न एनआईसीसीआई समर्पित छ ।