गैह्रीगाउँ हत्याकाण्ड : हतियारसहित एक जना पक्राउ

काठमाडौंको तीनकुने गैह्रीगाउँमा शुक्रवार राति भएको हत्याकाण्डमा संलग्नलाई प्रहरीले पक्राउ गरेको छ ।

चार जनाको हत्यामा संलग्न रहेको आशंकामा एक युवालाई आइतवार भक्तपुरको लोकन्थलीबाट पक्राउ गरिएको हो ।

‘सीसीटीभी फुटेजका आधारमा एक जनालाई हतियारसहित नियन्त्रणमा लिइएको छ, पत्रकार सम्मेलनमार्फत विवरण सार्वजनिक गर्छौं’ काठमाडौं प्रहरी परिसर स्रोतले जानकारी दियो ।

पक्राउ परेका व्यक्ति नै मुख्य हत्यारा रहेको निष्कर्षमा प्रहरी पुगेको छ । 

यसअघि सोही घटनामा संलग्न रहेको आशंकामा हिजो पनि एक जना पक्राउ परेका थिए ।

तीनकुनेमा रहेको दिव्य सःमिलमा शुक्रवार राति भएको घटनामा दोलखाको एकै परिवारका ३ सहित ४ जनाको ज्यान गएको थियो ।

मृत्यु हुनेमा दोलखा घर भई हाल सोही काष्ठ मिलमा गेट पालेको काम गर्ने ५६ वर्षका कुमार भुजेल, उनकी श्रीमती अन्दाजी ५२ वर्षीया अम्बिका भुजेल,  कुमारकी आमा ७६ वर्षीया शुभद्रा भुजेल र मोरङ बेलबारी स्थायी घर भएका अन्दाजी २० वर्षका नवीन राई रहेका छन् ।